کوئٹہ۔ 26 اگست (اے پی پی):صوبائی الیکشن کمشنر بلوچستان میں آج صوبائی ووٹر ایجو کیشن کمیٹی کا ایک اہم اجلاس منعقد ہوا جس کی صدارت صوبائی الیکشن کمشنر بلوچستان جناب علی اصغر سیال نے کی۔ اجلاس میں صوبائی ووٹر ایجو کیشن کمیٹی (PVEC) کے ممبران نے شرکت کی جن میں نادرا، یونیور سٹیز، میڈیا، سوشل ویلفیئر ڈیپارٹمنٹ اور مختلف سول سوسائٹی آرگنائزیشنز کے نمائندے شامل تھے۔ اجلاس میں بلوچستان کے مختلف اضلاع کی ڈسٹرکٹ ووٹر ایجو کیشن کمیٹی (DVEC) کی جانب سے پیش کی گئی تجاویز اور در پیش مسائل زیر بحث آئے۔
میٹنگ کے دوران شرکاء نے انتخابی عمل میں زیادہ سے زیادہ لوگوں کی شرکت یقینی بنانے کیلئے مختلف تجاویز دیں۔ انہوں نے کہا کہ خواتین کے شناختی کارڈز کے اجراء کیلئے مختص ایم۔ آر۔ ویز کی تعیناتی کے طریقہ کار کو مزید آسان بنانے کی ضرورت ہے۔ انہوں نے یہ بھی تجویز دی کہ زیادہ سے زیادہ نوجوانوں کی جمہوری عمل میں شمولیت سے جمہوری نظام مزید مستحکم ہو گا لہذا تجویز دی گئی کہ یونیورسٹی، کالج اور سکولوں کی سطح پر منظم اور جامع سیمینار منعقد کئے جائیں۔ شرکاء نے مزید کہا کہ معاشرے کے محروم طبقات سے تعلق رکھنے والے افراد کا مستند ڈیٹا اکٹھا کیا جائے تاکہ منظم اور ٹھوس حکمت عملی تیار کی جاسکے۔ صوبائی الیکشن کمشنر بلوچستان نے تمام شرکاء کی جامع تجاویز کو سراہا اور ان کی شرکت پر ان کا شکر یہ ادا کیا۔
