صوبہ اس وقت دہشتگردی، گورننس کے خلا اور معاشی بدحالی کی لپیٹ میں ہے ،گورنر خیبرپختونخوا

پشاور۔ 07 اپریل (اے پی پی):گورنر خیبرپختونخوا فیصل کریم کنڈی نے کہا ہے کہ صوبہ اس وقت دہشتگردی، گورننس کے خلا اور معاشی بدحالی جیسے سنگین چیلنجز کا سامنا کر رہا ہے، بدعنوانی اور سیاسی اونر شپ نہ لینا بھی خیبر پختونخوا کے مسائل میں شامل ہے، صوبہ میں گورننس کا معیار بہتر بنانے کیلئے فنڈز کا شفاف استعمال انتہائی ضروری ہے۔ان خیالات کا اظہار انہوں نے پیر کے روز اسلام آباد پالیسی ریسرچ انسٹیٹیوٹ کے زیراہتمام”خیبرپختونخوا میں سیکیورٹی اور گورننس کے چیلنجز” کے موضوع پر منعقدہ سیمینار کے افتتاحی سیشن سے خطاب کرتے ہوئے کیا-

تقریب سے خطاب کرتے ہوئے گورنر خیبرپختونخوا نے کہا کہ خیبرپختونخوا صوبہ ایک عرصے سے دہشتگردی کی لپیٹ میں ہے،اگرچہ سیکیورٹی فورسز نے بڑی قربانیاں دے کر امن بحال کیا ہے، لیکن خطرات اب بھی مکمل طور پر ختم نہیں ہوئے۔ فاٹا کے انضمام کے بعد نئے اضلاع میں حکمرانی کا خلا، بارڈر پر جرائم کی سرگرمیاں، بدعنوانی، اور سیاسی بے دخلی جیسے عوامل اب بھی شدت کے ساتھ موجود ہیں۔

انہوں نے کہا کہ سرحدی علاقوں میں مؤثر انتظامات، بین الاداراہی ہم آہنگی اور پائیدار پالیسی سازی ناگزیر ہو چکی ہے تاکہ دہشتگردی اور جرائم کی جڑوں کو ختم کیا جا سکے۔ گورنر نے خاص طور پر عوامی فنڈز کی بدانتظامی پر تشویش ظاہر کی اور بتایا کہ گزشتہ دہائی میں خیبرپختونخوا میں ترقیاتی فنڈز کا غلط استعمال ہوا، جبکہ قانون سازی کے باوجود خاطرخواہ نتائج حاصل نہ ہو سکے۔

گورنر نے بہترین گورننس کیلئے پبلک اکاؤنٹس کمیٹیوں کو مزید مؤثر بنانے، آڈٹ رپورٹس پر کھلی سماعتوں کے انعقاد اور حکومتی احتساب کے بہتر نظام کی ضرورت پر زور دیا۔ انہوں نے کہا کہ جب تک مالیاتی نظم و نسق اور شفافیت کو یقینی نہیں بنایا جائے گا، اچھی حکمرانی کا خواب شرمندہ تعبیر نہیں ہو سکتا۔ انہوں نے اُمید ظاہر کی کہ اتحاد، عزم اور مشترکہ حکمتِ عملی کے ذریعے خیبرپختونخوا کو ایک پرامن، خوشحال اور ترقی یافتہ صوبہ بنایا جا سکتا ہے۔

Short Link: https://urdu.app.com.pk/urdu/?p=579117