کوئٹہ۔ 22 جولائی (اے پی پی):وزیر اعلیٰ بلوچستان میر سرفراز بگٹی نے کہا ہے کہ صوبہ بھر میں دہشت گردوں کے خلاف بھرپور کارروائیاں جاری ہیں اور دشمن کے ناپاک عزائم کو ہر محاذ پر ناکام بنایا جائے گا ۔ سماجی رابطے کی ویب سائٹ ایکس پر اپنے ایک پیغام میں وزیر اعلیٰ نے کہا کہ سیکیورٹی فورسز نے جواں مردی، پیشہ ورانہ مہارت اور بلند حوصلے کے ساتھ ایک اور اہم کامیابی حاصل کرتے ہوئے فتنہ الہندوستان سے وابستہ 8 دہشت گردوں کو جہنم واصل کیا،
انہوں نے کہا کہ یہ دہشت گرد معصوم اور بے گناہ شہریوں کو بسوں سے اتار کر شہید کرنے جیسی بزدلانہ کارروائیوں میں ملوث تھے ،وزیر اعلیٰ نے کہا کہ بلوچستان کے امن کو سبوتاژ کرنے والے عناصر کو ہر حال میں منطقی انجام تک پہنچایا جائے گا ،دہشت گردوں کے سہولت کار بھی قانون کی گرفت سے نہیں بچ سکیں گے ،
انہوں نے کہا کہ ہماری ریاست، عوام اور سیکیورٹی فورسز متحد ہیں، ہم مل کر دشمن کے ہر وار کو ناکام بنائیں گے ،بلوچستان میں اب صرف امن، ترقی اور خوشحالی ہوگی، دہشت اور تخریب کا دور ختم ہو چکا ہے ،وزیر اعلیٰ نے سیکیورٹی فورسز کو کامیاب آپریشن پر خراج تحسین پیش کیا اور کہا کہ پوری قوم اپنی بہادر فورسز کے شانہ بشانہ کھڑی ہے۔
