لاہور۔15دسمبر (اے پی پی):سیکرٹری زراعت پنجاب افتخار علی سہو نے کہا ہے کہ صوبہ پنجاب میں گندم کی کاشت کا مرحلہ کامیابی سے پایہ تکمیل کو پہنچ چکا اوراب تک صوبہ میں1 کروڑ 67 لاکھ ایکڑ رقبہ پر گندم کاشت کی جاچکی ہے جبکہ رواں سال گندم کاشت ہدف 1 کروڑ 65 لاکھ ایکڑ مقرر کیا گیا تھا۔ان خیالات کا اظہار انہوں نے ایگریکلچر ہائوس لاہور میں منعقدہ اجلاس کی صدارت کرتے ہوئے کیا۔ انہوں نے کہا کہ وزیر اعلیٰ پنجاب کے خصوصی کسان پیکج کے گندم کی کاشت کے دوران مثبت اثرات واضح طور پر نظر آئے ہیں
گندم کاشت ہدف کے حصول کیلئے جامع پلان پر عملدرآمد کیا گیا۔انہوں نے کہا کہ رواں سال گندم کی کاشت ایک چیلنجنگ ٹاسک تھا لیکن محکمہ زراعت پنجاب کی فیلڈ فارمیشنز نے متحرک کردار ادا کیا اور اس مہم کی کامیابی میں ڈویژنل و ڈسٹرکٹ انتظامیہ نے بھی بھرپور تعاون کیا۔انہوں نے مزید کہا کہ گندم کاشت مہم کی کامیابی میں کاشتکاروں کا بھرپور تعاون بھی قابل ستائش رہا، علاوہ ازیں محکمہ زراعت پنجاب نے بھی کاشتکاروں کو زرعی مداخل کی مقرر کردہ نرخوں پر دستیابی یقینی بنائی۔
انہوں نے کہاکہ گندم کی فی ایکڑ زیادہ پیداوار کے حصول کیلئے نگہداشتی امور پر عملدرآمد جاری ہے۔اجلاس میں ڈائریکٹر جنرلز زراعت چوہدری عبدالحمید، رانا تجمل اور نوید عصمت کاہلوں سمیت دیگر اعلی افسران نے شرکت کی۔
Short Link: https://urdu.app.com.pk/urdu/?p=536363
