اسلام آباد۔10مئی (اے پی پی):ضلعی انتظامیہ اسلام آباد نے ہنگامی صورتحال سے نمٹنے کی منصوبہ بندی مکمل کرتے ہوئے وفاقی دارالحکومت کے تمام ہسپتالوں میں ہائی الرٹ جاری کردیا ہے۔ ہفتہ کو ضلعی انتظامیہ کی جانب سے جاری بیان کے مطابق ڈپٹی کمشنر اسلام آباد عرفان نواز میمن نے کہا ہے کہ شہر کے 19 ہسپتالوں میں 2 ہزار 389 اضافی بیڈز مختض کر دئیے گئے، شہر بھر میں ہنگامی صورتحال کے لیے 69 ایمبولینسز میسر ہونگی،ہسپتالوں میں ادویات، خون اور آکسیجن سپلائی کے لیے بھی اقدامات مکمل کر لئے ہیں۔ عرفان میمن نے کہا کہ ڈسٹرکٹ ہیلتھ آفس میں 26 ریسکیو 1122 میں 12 ایمبولینسز سٹینڈ بائے رہیں گی، کسی بھی ہنگامی صورتحال میں شہریوں کے لیے 46 شیلٹر ہاؤسز بھی قائم کر دئیے گئے، شہر بھر میں سول ڈیفنس کے 446 والنٹیرز بھی امدادی سرگرمیوں میں حصہ لیں گے۔
انہوں نے کہا کہ سیف سٹی کمپلیکس میں ضلعی انتظامیہ کا ڈسٹرکٹ کنٹرول روم 24/7 فنکشنل ہوگا،شہر بھر کی 48 بلند عمارات پر ایمرجنسی سائرن نصب کر دئیے گئے ہیں، مختلف ایمرجنسی اعلانات کے حوالے سے شہر بھر کی مساجد کے ساتھ بھی کوآرڈینیشن مکمل کر لیا گیا ہے۔ ڈی سی اسلام آباد نے تمام افسران کو ہمہ وقت فیلڈ میں رہنے کی واضح ہدایات دیتے ہوئے کہا ہے کہ ڈیوٹی میں کسی بھی قسم کی کوتاہی کسی صورت قابل قبول نہیں، ہنگامی حالات میں شہریوں سے ضلعی انتظامیہ کے ساتھ خصوصی تعاون کی اپیل کی، شہری ضلعی انتظامیہ کی ہدایات پر من و عن عمل درآمد یقینی بنائیں، کسی بھی ہنگامی صورتحال میں ڈسٹرکٹ کنٹرول روم سے فوری رابطہ کریں، شہری ڈرونز گرنے یا دیگر خبروں کی تصدیق کے لیے ڈی سی آفس کے سوشل میڈیا پر نظر رکھیں۔
Short Link: https://urdu.app.com.pk/urdu/?p=595278
