گلگت۔29اگست (اے پی پی):ضلع دیامر چلاس ہڈر میں دہشت گردوں کے گلگت بلتستان سکاوٹس پر بزدلانہ حملے کے بعد سکیورٹی فورسز نے پورے علاقے کو گھیرے میں لے کر سرچ آپریشن شروع کر دیا ہے۔ حملے میں ایک صوبیدار شہید اور دو اہلکار زخمی ہوئے ہیں۔وزیر داخلہ شمس لون نے اس واقعے کی شدید مذمت کرتے ہوئے کہا ہے کہ بزدل دہشت گرد کسی رعایت کے مستحق نہیں اور انہیں نشان عبرت بنایا جائے گا۔
انہوں نے مزید کہا کہ فورسز ان دہشت گردوں کا تعاقب کر رہی ہیں اور جلد ہی انہیں کیفر کردار تک پہنچایا جائے گا۔حملے کے فوری بعد سکیورٹی فورسز کی بھاری نفری موقع پر پہنچ گئی ہے اور علاقے کو سیل کر کے سرچ آپریشن کا دائرہ وسیع کر دیا ہے۔
واقعہ میں زخمی اہلکاروں کو طبی امداد کے لیے ہسپتال منتقل کر دیا گیا ہے اور ان کی حالت خطرے سے باہر ہے۔یہ حملہ دہشت گردی کے خلاف جاری جنگ میں ایک اور افسوس ناک واقعہ ہے۔
