عمان۔21اکتوبر (اے پی پی):اردن نے شمالی غزہ میں اسرائیل کی جانب سے فلسطینیوں کی نسل کشی کی کارروائیوں کی شدید مذمت کرتے ہوئے عالمی برادری سے مطالبہ کیا ہے کہ وہ غزہ میں اسرائیل کی غیر انسانی کارروائیاں روکے۔ العربیہ اردو کے مطابق اردن کے نائب وزیر اعظم اور وزیر خارجہ ایمن الصفدی نے گزشتہ روزسوشل میڈیا پلیٹ فارم ایکس پر کہا ہے کہ اسرائیلی جارحیت غیر انسانی ہے اور جنگی جرائم کے زمرے میں آتی ہے۔انہوں نے کہا کہ اسرائیل نے شمالی غزہ کی آبادی پر خوفناک کارروائیاں جاری رکھی ہوئی ہیں جو غیر انسانی ہے۔ یہ ایسا جنگی جرم ہے جسے انسانیت کو برداشت نہیں کرنا چاہیے۔
انہوں نے مزید کہا کہ فلسطینیوں کی اموات کو روکنے کے لیے بین الاقوامی برادری کو فوری طور پر فیصلہ کن اقدامات کرنے چاہیئں۔ ایمن الصفادی نے کہا کہ معصوم فلسطینیوں کی زندگیوں کو بچانے میں ناکامی کا کوئی جواز ، بہانہ یا عذر جائز نہیں ہو سکتا ہے۔ انہوں نے بین الاقوامی برادری اور عالمی اداروں سے مطالبہ کیا کہ نسلی بنیادوں پر فلسطینیوں کا قتل عام کرنے سے اسرائیل کو روکا جائے اور بین الاقوامی قانون کی عمل داری یقینی بنائی جائے۔واضح رہے کہ غزہ میں جاری اسرائیلی جنگ کے نتیجے میں اب تک تقیباً 43 ہزار فلسطینی شہید ہو چکے ہیں جن میں بڑی تعداد خواتین اور بچوں کی ہے۔
