اسلام آباد۔5فروری (اے پی پی): یوم یکجہتی کشمیر کی مناسبت سے قاہرہ میں پاکستانی سفارت خانے کے زیر اہتمام ”کشمیریوں کی حق خودارادیت کی منصفانہ جدوجہد کو خراج تحسین”کے عنوان سے ایک سیمینار کے مقررین نے مطالبہ کیا کہ عالمی برادری بھارتی حکومت کے فاشسٹ، کشمیری مخالف اور مسلم مخالف اقدامات کی پرزور مذمت کرے، مقبوضہ کشمیر ایک متنازعہ علاقہ ہے اور بھارت نے یکطرفہ طور پر اس کی متنازعہ حیثیت تبدیل کردی ہے۔
یوم یکجہتی کشمیر کے موقع پر یہاں موصولہ پریس ریلیز کے مطابق یوم یکجہتی کشمیر کی مناسبت سے قاہرہ میں پاکستانی سفارت خانے کے زیر اہتمام ”کشمیریوں کی حق خودارادیت کی منصفانہ جدوجہد کو خراج تحسین”کے عنوان سے ایک سیمینار کا انعقاد کیا گیا۔ تقریب میں دانشوروں، سول سوسائٹی کے ارکان، میڈیا پرسنز، طلبا اور پاکستانی کمیونٹی کے افراد کی بڑی تعداد نے شرکت کی۔ تقریب کے آغاز میں صدر، وزیر اعظم اور وزیر خارجہ کے پیغامات پڑھ کر سنائے گئے۔ تقریب کے دوران بھارتی ریاستی جبر اور کشمیریوں کی حالت زار کو اجاگر کرنے والی ایک دستاویزی فلم بھی دکھائی گئی۔
اس موقع پر مقبوضہ جموں و کشمیر میں جاری انسانی حقوق کی خلاف ورزیوں کی تصاویر بھی آویزاں کی گئیں۔مصرکے دانشوروں اور ماہرین تعلیم کی نمائندگی کرنے والے مہمان مقررین نے اپنی تقاریر میں اس بات پر زور دیا کہ مقبوضہ کشمیر ایک متنازعہ علاقہ ہے اور بھارت نے یکطرفہ طور پر اس کی متنازعہ حیثیت تبدیل کردی ہے۔ مقررین نے کہا کہ مقبوضہ کشمیر میں بھارتی ریاستی جبر کا سلسلہ بلا روک ٹوک جاری ہے اور بھارتی سیکیورٹی فورسز مقبوضہ علاقے میں انسانی حقوق کی سنگین خلاف ورزیاں کر رہی ہیں۔ مقررین نے زور دیا کہ اقوام متحدہ کی سلامتی کونسل کی متعلقہ قراردادوں پر عمل درآمد کیا جائے اور کشمیریوں کو اپنا ناقابل تنسیخ حق خودارادیت استعمال کرنے کا موقع دیا جائے۔
مہمان مقررین نے مطالبہ کیا کہ عالمی برادری بھارتی حکومت کے فاشسٹ، کشمیری مخالف اور مسلم مخالف اقدامات کی پرزور مذمت کرے۔ مقررین نے کہا کہ مقبوضہ کشمیر میں بھارتی قابض افواج کی جانب سے انسانی حقوق کی سنگین خلاف ورزیوں پر عالمی برادری کی فوری توجہ کی ضرورت ہے۔سفیر ساجد بلال نے کشمیر کاز کو اجاگر کرنے پر مہمان مقررین کی تعریف کی اور عالمی برادری پر زور دیا کہ وہ مقبوضہ کشمیر میں بھارتی ریاستی جبر کے خاتمے کے لیے مداخلت کرے۔ انہوں نے کہا کہ شرکا کی جانب سے اظہار خیال مصر کے عوام کی جانب سے مقبوضہ کشمیر میں اپنے مسلمان بھائیوں کی بھرپور حمایت کا مظہر ہے۔
سفیر نے کہا کہ بھارت کا 5 اگست 2019 کا یکطرفہ اور غیر قانونی اقدام کشمیری عوام کو ان کی اپنی سرزمین پر اقلیت میں تبدیل کرنے کی بدنیتی پر مبنی کوشش ہے۔انہوں نے کہا کہ بھارتی سپریم کورٹ کا 11 دسمبر 2023 کا فیصلہ کشمیری عوام کے حق خودارادیت کو کمزور کرنے کی بھارتی خواہش کا ایک اور مظہر ہے۔انہوں نے حق خودارادیت کے حصول کے لئے گراں قدر قربانیاں دینے پر مقبوضہ کشمیر کے بہادر عوام اور حریت قیادت کی قربانیوں کو خراج تحسین پیش کیا۔
سفیرنے اس عزم کا اعادہ کیا کہ پاکستان ہر فورم پر کشمیری عوام کی اس وقت تک اخلاقی، سیاسی اور سفارتی حمایت جاری رکھے گا جب تک کہ مقبوضہ جموں و کشمیر کے عوام اقوام متحدہ کی سلامتی کونسل کی قراردادوں اور اپنی خواہشات اور امنگوں کے مطابق اپنے ناقابل تنسیخ حق خودارادیت کے حصول کے قابل نہیں ہو جاتے۔
