اسلام آباد۔1اکتوبر (اے پی پی):قومی اسمبلی کے سپیکر سردار ایاز صادق نے مشرق وسطیٰ اور مقبوضہ جموں و کشمیر میں بنیادی انسانی حقوق کی خلاف ورزیوں اور تشدد کے خاتمے کی فوری ضرورت پر زور دیتے ہوئے کہا ہے کہ عالمی برادری پائیدار امن اور ترقی کے لئے بات چیت کو فروغ دے کر امن کا کلچر اور تشدد سے پاک معاشرہ قائم کرے ۔ ان خیالات کا اظہار انہوں نے عدم تشدد کے عالمی دن کے موقع پر اپنے پیغام میں کیا جو ہر سال 2 اکتوبر کو پوری دنیا میں اقوام متحدہ کے زیراہتمام منایا جاتا ہے۔
غزہ اور لبنان میں اسرائیلی مظالم کی مذمت کرتے ہوئے سپیکر قومی اسمبلی نے کہا کہ امن و ترقی کے لئے تشدد سے پاک اور انصاف پسند معاشرے کا قیام ناگزیر ہے۔ انہوں نے کہا کہ پاکستان کے آئین میں ایسے اصول شامل ہیں جو اسلام کی اخلاقی اور ثقافتی اقدار کی عکاسی کرتےہیں۔ انہوں نے مزید کہا کہ پاکستان کا آئین بچوں، عورتوں اور مردوں کو ہر قسم کے تشدد سے تحفظ فراہم کرتا ہے۔
انہوں نے کہا کہ خواتین ارکان پارلیمنٹ کے گروپ ویمن کاکس کے ساتھ ساتھ بچوں کے حقوق اور پائیدار ترقی کے اہداف پر قائم پارلیمانی ٹاسک فورس قومی اسمبلی میں قائم کی گئی ہے تاکہ قانون سازی کو یقینی بنایا جا سکے جس کا مقصد مذہب سے بالاتر ہو کر ہر فرد کے حقوق کے تحفظ کو یقینی بنانا ہے ، جنس، نسل، یا سماجی و اقتصادی حیثیت سے بالاتر ہوکر ہر قسم کے تشدد کی روک تھام بے حد ضروری ہے ۔
انہوں نے کہا کہ پارلیمانی کمیٹی برائے کشمیر بھی مظلوم کشمیریوں کی آواز بلند کرنے کے لئے انتھک محنت کرتی ہےجبکہ شہریوں کے بنیادی حقوق کے تحفظ کے لئے قائمہ کمیٹی برائے انسانی حقوق تشکیل دی گئی ہے۔ سپیکر نے کہا کہ پاکستان کی پارلیمنٹ اپنے شہریوں کو کسی بھی قسم کے تشدد اور ناانصافی سے بچانے کے لئے پرعزم ہے۔