اسلام آباد۔16اپریل (اے پی پی):گورنر خیبرپختونخوا فیصل کریم کنڈی نے کہا ہے کہ دنیا کو درپیش غیر یقینی حالات، تکنیکی ترقی اور عالمی تبدیلیوں کے اس دور میں ہمیں اجتماعی بصیرت، جدت اور استقامت کے ساتھ آگے بڑھنے کی ضرورت ہے۔ان خیالات کا اظہار انہوں نے بدھ کو اسلام آباد میں منعقدہ "لیڈرز ان اسلام آباد بزنس سمٹ 2025” کے افتتاحی سیشن میں بطور مہمان خصوصی خطاب کرتے ہوئے کیا۔افتتاحی سیشن میں نٹ شیل گروپ کے بانی محمد ظفر احسن سمیت ماہرین اقتصادی امور، سرمایہ کار و بزنس کمیونٹی شریک تھے۔
گورنر خیبر پختونخوا نے اپنے خطاب میں بزنس سمٹ 2025 کے انعقاد کو خوش آیئند قرار دیتے ہوئے کہا کہ ایسے پلیٹ فارمز سے ہمیں دنیا کے رہنماؤں سے سیکھنے اور شراکت کے مواقع میسر آتے ہیں۔انہوں نے کہا کہ دنیا کو درپیش غیر یقینی حالات، تکنیکی ترقی اور عالمی تبدیلیوں کے اس دور میں ہمیں اجتماعی بصیرت، جدت اور استقامت کے ساتھ آگے بڑھنے کی ضرورت ہے۔خیبرپختونخوا کو اقتصادی سرگرمیوں کا مرکز بنا رہے ہیں۔گورنر فیصل کریم کنڈی کا کہنا تھا کہ اقتصادی ترقی حکومتوں یا کمپنیوں کے سربراہان کی ذمہ داری نہیں بلکہ ہم سب کا مشترکہ سفر ہے جس میں ہمیں غیر یقینی صورتحال کو مواقع میں بدلنا ہے۔
گورنر نے اپنے خطاب میں خیبرپختونخوا کی تاریخی اہمیت پر روشنی ڈالتے ہوئے کہا کہ یہ صوبہ صدیوں سے وسطی اور جنوبی ایشیا کے درمیان ایک پل کی حیثیت رکھتا آیا ہے، اور آج بھی یہ علاقہ تجارت، ثقافت اور ترقی کے لئے بے پناہ امکانات رکھتا ہے۔انہوں نے کہا کہ امن ہماری خوشحالی ہے۔سکیورٹی میں بہتری کے ساتھ معیشت کو بھی فروغ ملتا ہے۔ ہمارا صوبہ تنازعہ سے متاثر خطے سے ایک ابھرتے ہوئے معاشی مرکز میں تبدیل ہو رہا ہے۔آخر میں گورنر فیصل کریم کنڈی نے عالمی برادری سےخیبرپختونخوا میں سرمایہ کاری اور شراکت داری کی دعوت دیتے ہوئے کہا کہ آئیے خیبرپختونخوا کو ایک ایسی مثال بنائیں جہاں عزم، مواقع اور وژن مل کر ترقی کی نئی راہیں ہموار کریں۔
Short Link: https://urdu.app.com.pk/urdu/?p=582722
