عجمان ۔14مارچ (اے پی پی):عجمان یونیورسٹی ڈیٹا سائنس اور مصنوعی ذہانت میں دنیا کی ٹاپ 100 جامعات میں شامل ہو گئی۔امارات نیوز ایجنسی وام کے مطابق عجمان یونیورسٹی نے کیو ایس ورلڈ یونیورسٹی رینکنگ برائے مضامین 2025 میں ڈیٹا سائنس اور مصنوعی ذہانت کے شعبے میں دنیا کی ٹاپ 100 جامعات میں51 نمبر پر اپنی جگہ بنا لی ہے۔یہ کامیابی عجمان یونیورسٹی کو متحدہ عرب امارات میں اس شعبے میں پہلے نمبر پر اور ملک کی واحد نمائندہ یونیورسٹی کے طور پر نمایاں کرتی ہے۔
علاوہ ازیں، یونیورسٹی نے فارمیسی اور فارماکولوجی میں عالمی سطح پرٹاپ 200 میں سے 151رینکنگ حاصل کی اور اس شعبے میں بھی متحدہ عرب امارات میں پہلی پوزیشن حاصل کی۔یونیورسٹی نے کمپیوٹر سائنس اور انفارمیشن سسٹمز، اور ریاضی میں دنیا کی ٹاپ 250 جامعات میں 201پر جگہ بنائی، جبکہ متحدہ عرب امارات میں دونوں شعبوں میں دوسری پوزیشن حاصل کی۔
اسی طرح، اکاؤنٹنگ اور فنانس میں عالمی سطح پر ٹاپ 300 میں 251ریکنگ حاصل کی ہے۔ عجمان یونیورسٹی نے وسیع تر موضوعاتی درجہ بندی میں بھی نمایاں بہتری دکھائی اور کچھ مضامین میں 200 درجے تک ترقی کی۔سوشل سائنسز اور مینجمنٹ میں، عجمان یونیورسٹی نے عالمی سطح پر 284ویں پوزیشن حاصل کی، جو گزشتہ سال 500 میں سے 451 پر تھی۔ اس شعبے میں یونیورسٹی اب متحدہ عرب امارات میں تیسرے نمبر پر آ گئی ہے۔
Short Link: https://urdu.app.com.pk/urdu/?p=572420
