بغداد۔5مئی (اے پی پی):عراق نے عازمین حج کو ہدایت کی ہے کہ وہ ایسے لباس پہننے یا تصاویر، جھنڈے یا علامات اٹھانے سے گریز کریں جن میں سیاسی اور فرقہ وارانہ نوعیت کی کوئی بات ظاہر ہو ۔ العربیہ اردو کے مطابق عراق کی اعلیٰ حج و عمرہ کمیٹی نے عازمین حج کو یہ بھی متنبہ کیا ہے کہ وہ ایسے افراد کو پناہ نہ دیں اور نہ ہی انہیں منتقل کریں جن کے پاس باضابطہ حج کا اجازت نامہ نہ ہو۔کمیٹی نے مسجد الحرام اور مسجد نبوی میں مذہبی اور سیاسی شخصیات اور علامات کی تصاویر نہ بنائیں۔
سوشل میڈیا پر خلاف ورزی پر مبنی الیکٹرانک اشاعت اور مناسک حج کو سیاسی یا اشتعال انگیز خیالات پھیلانے کے لیے استعمال نہ کر نے کی ہدایت کی ہے ۔اعلیٰ حج و عمرہ کمیٹی نے ان شہریوں کو جو مقدس سرزمین جانے کے اہل ہیں حج کے سکون کو خراب کرنے والی چیزوں سے دور رہنے کی ہدایت کی ہے۔ کمیٹی نے بیان میں واضح کیا کہ حج ایک عظیم مذہبی موقع ہے جو دنیا بھر کے مسلمانوں کو اکٹھا کرتا ہے، اس مناسک کی روحانیت اور وحدت کا احترام اور اس کی قدر کی جانی چاہیے۔
عراقی کمیٹی نے تمام عازمین حج کو خبردار کیا ہے کہ وہ زمینی اور فضائی سفر کے دوران ممنوعہ مواد ساتھ نہ لے جائیں۔ ممنوعہ مواد میں نشہ آور ادویات، الکوحل، زیورات ، قیمتی پتھر اور مقررہ حد سے زیادہ نقدی شامل ہے۔کمیٹی نے سعودی عرب میں ذمہ دار حکام کے ساتھ حج کے حوالے سے ضوابط اور منصوبوں کے نفاذ کے لیے تعاون کرنے کی ہدایت کی اور ہر اس چیز سےگریز کرنے کی ہدایت کی جو مختلف قومیتوں اور مسالک کے عازمین حج کے درمیان بغض اور عداوت کا باعث بنے۔
Short Link: https://urdu.app.com.pk/urdu/?p=592511
