اسلام آباد۔13اکتوبر (اے پی پی):علامہ اقبال اوپن یونیورسٹی ایشین ایسوسی ایشن آف اوپن یونیورسٹیز (اے اے او یو) کی 37ویں سالانہ کانفرنس کا انعقاد کر رہی ہے۔15 اکتوبر سے شروع ہونے والی تین روزہ کانفرنس میں یورپ، ایشیا، امریکا، کینیڈا، چین، جاپان، آسٹریلیا اور جنوبی افریقہ سمیت 20 سے زائد ممالک کے نامور تعلیمی ماہرین شرکت کریں گے۔ 37 ویں اے اے او یو کانفرنس کا آغاز کل پیر 14 اکتوبر کو ایک پری ورکشاپ سے ہوگا جس میں مختلف بین الاقوامی وفود کی شرکت ہوگی۔
افتتاحی اجلاس 15 اکتوبر کو صبح 9 بجے مقرر ہے جس میں وفاقی وزیر برائے تعلیم و پیشہ وارانہ تربیت خالد مقبول صدیقی مہمان خصوصی ہوں گے۔ علامہ اقبال اوپن یونیورسٹی کے وائس چانسلر پروفیسر ڈاکٹر ناصر محمود نے اس بات پر زور دیا کہ کانفرنس کا مقصد تعلیمی شعبے میں مستقبل کے چیلنجز سے نمٹنے اور موثر تعلیمی حکمت عملیوں کے ذریعے سماجی اور اقتصادی ترقی کو بڑھانے کے لیے سفارشات تیار کرنا ہے۔
کانفرنس کے کوآرڈینیٹر ڈاکٹر زاہد مجید نے کہا کہ یہ تقریب 200 سے زائد پاکستانی ماہرین تعلیم کے ساتھ 20 ممالک کے تقریباً 80 بین الاقوامی ماہرین کو راغب کرے گی۔قابل ذکر کلیدی مقررین میں کینیڈا، آسٹریلیا، جنوبی افریقہ، انڈونیشیا اور پاکستان کے اسکالرز شامل ہوں گے۔اس اہم اجتماع کا مقصد فاصلاتی تعلیم کے شعبے میں مکالمے اور تعاون کو فروغ دینا ہےجس کا مقصد دنیا بھر میں تعلیمی طریقوں اور رسائی کو بہتر بنانا ہے۔
