کراچی۔17اکتوبر (اے پی پی):گورنر سندھ عمران اسماعیل کی زیر صدارت گورنر ہائوس میں صوبہ میں توانائی کی صورتحال کے بارے میں اعلی سطح اجلاس منعقد ہوا۔جاری اعلامیہ کے مطابق اجلاس میں وفاقی وزیر برائے نجکاری محمد میاں سومرو ، وفاقی وزیر بحری امور سید علی زیدی اور وزیر اعظم کے معاون خصوصی برائے توانائی تابش گوھر نے شرکت کی ۔اجلاس میں اراکین صوبائی اسمبلی فردوس شمیم نقوی، حلیم عادل شیخ ، خرم شیر زمان اور اشرف قریشی بھی موجود تھے۔وزیر اعظم کے معاون خصوصی تابش گوھر نے گورنر سندھ کو کراچی میں بجلی کی صورتحال اور کے الیکٹرک پر بریفنگ دی۔اجلاس میں حیدر آباد الیکٹرک سپلائی کمپنی (حیسکو) اور سکھر الیکٹرک پاور کمپنی ( سیپکو) کے معاملات بھی زیر غور آئے۔گورنر سندھ نے اس موقع پر کہا کہ بجلی کے پیداواری اور ترسیلاتی نظام میں بہتری وقت کی ضرورت ہے تاکہ صارفین کو بجلی کی مسلسل فراہمی کو یقینی بنایا جاسکے۔
