اسلام آباد ۔ 11 جون (اے پی پی) وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ وزیراعظم عمران خان اس ملک کے بچوں کے تابناک اور روشن مستقبل اور ان کی فلاح و بہبود کے لئے بھرپور جدوجہد کر رہے ہیں۔ انہوں نے منگل کونجی نیوز چینل کے پروگرام میں بات چیت کرتے ہوئے کہا کہ پاکستان پیپلز پارٹی اور مسلم لیگ (ن) کے رہنماﺅں کے بچے بیرون ملک رہ رہے ہیں، اس لئے ان رہنماﺅں کو پاکستانی غریب عوام کے بچوں کے مستقبل کی کوئی پرواہ نہیں۔ انہوں نے آئندہ مالی سال کے لئے پاکستان تحریک انصاف کے پیش کردہ بجٹ پر تبصرہ کرتے ہوئے کہا کہ بجٹ سے ملک میں اقتصادی استحکام لانے کی راہ ہموار ہوگی اور اس بجٹ سے ملک کے تمام بچوں کا مستقبل بھی بہتر ہو جائے گا۔ انہوں نے کہاکہ پیپلز پارٹی اور مسلم لیگ (ن) کے رہنماﺅں نے ملکی معیشت کے ساتھ کھلواڑ کر کے اسے تباہ کیا جس کی وجہ سے پاکستانی عوام کو شدید مشکلات کا سامنا ہے۔ انہوں نے کہا کہ کرپشن اور منی لانڈرنگ کرنے والے آج جیلوں میں ہیں۔
