عمران خان شہباز شریف کی کارکردگی سے خوفزدہ ہیں، مریم اورنگزیب

اسلام آباد۔4جون (اے پی پی): وفاقی وزیر اطلاعات و نشریات مریم اورنگزیب نے تحریک انصاف کے چیئرمین عمران خان کو چپ کر کے بیٹھنے اور 2023ء تک انتظار کرنے کا مشورہ دیتے ہوئے کہا ہے کہ عمران صاحب شہباز شریف کی کارکردگی سے خوفزدہ ہیں، عمران صاحب کو پتہ ہے کہ شہباز شریف اسی محنت اور توجہ سے کام کرتے رہے تو مہنگائی کم ہو جائے گی۔

ہفتہ کو اپنے ایک بیان میں انہوں نے کہا کہ عمران صاحب کو پتہ ہے کہ شہباز شریف معیشت ٹھیک کر دیں گے، انہیں یہ بھی معلوم ہے کہ شہباز شریف تمام ملکوں سے بگاڑے گئے تعلقات بھی ٹھیک کر دیں گے۔ انہوں نے کہا کہ عمران صاحب کو یقین ہے کہ شہباز شریف کو کام کرنے دیا تو پاکستان میں سرمایہ کاری واپس لے آئیں گے، شہباز شریف انشاء اللہ نوجوانوں کو روزگار دیں گے۔

انہوں نے کہا کہ احتساب، ریاست مدینہ، سازش کے بیانیے دفن ہونے کے بعد عمران صاحب کا نیا بیانیہ ڈیڑھ ماہ کی کارکردگی بن گیا ہے۔ انہوں نے کہا کہ اپنی نالائقی، نااہلی، کرپشن اور سیاسی منافقت کا چہرہ آئینے میں دیکھیں اور پھر تقریر کیا کریں، چپ کر کے گھر بیٹھیں اور 2023 میں مزید مسترد ہونے کا انتظار کریں۔ وفاقی وزیر اطلاعات نے کہا کہ شہباز شریف آپ کی تباہ کی ہوئی معیشت سنبھالیں گے اور آپ کے پھیلائے ہوئے فتنے کا بھی خاتمہ کریں گے۔

عمران خان 2014ء میں کنٹینر پر بھی نواز شریف اور شہباز شریف، حکومت میں بھی نواز شریف اور شہباز شریف اور اب پھر کنٹینر پر نواز شریف اور شہباز شریف کے خلاف بولتے رہے۔ انہوں نے کہا کہ شہباز شریف عمران خان کی تباہ کی ہوئی معیشت کو ٹھیک کر رہے ہیں۔ ان کی لگائی گئی مہنگائی، بے روزگاری اور معاشی تباہی کی آگ شہباز شریف بجھا رہے ہیں۔ چار سال میں معاشی تباہی اور مہنگائی لانے والا ڈیڑھ ماہ کا حساب مانگ رہا ہے۔

Short Link: https://urdu.app.com.pk/urdu/?p=310550