ریاض ۔ 22 ستمبر (اے پی پی) سعودی عرب کے وزیر حج وعمرہ ڈاکٹر محمد صالح بنتن نے آئندہ مرحلے میں عمرہ و زیارت کی مرحلہ وار بحالی بارے تفصیلات سے آگاہ کیا ہے۔وہ عمرہ پروگرام کو یادگار اورآسان تر بنانے سے متعلق عمرہ فورم میں اظہار خیال کر رہے تھے۔انہوں نے کہا کہ سعودی عرب حفظان صحت کے ضوابط کی پابندی کے ساتھ عمرہ بتدریج بحال کرنے والا ہے۔ آئندہ مرحلے میں عمرہ کی کارروائی کے سلسلسلے میں جدید ٹیکنالوجی پر انحصار کیا جائے گا تاکہ عمرہ کمپنیاں اور ادارے اندرون اور بیرون ملک عمرہ پیکیج جدید شکل میں متعارف کراسکیں۔انہوں نے کہا کہ وزارت ایک ایپ جاری کرے گی، عمرہ کے خواہشمند افراد اس کے ذریعے اپنی آسانی کو پیش نظر رکھتے ہوئے عمرہ ادا کرنے کی تاریخ اور وقت کا تعین کریں گے۔ڈاکٹر محمد صالح بنتن نے بتایا کہ عمرہ پروگرام کے سلسلے میں 30 سے زیادہ سعودی اور بین الاقوامی کمپنیوں کو کام کا موقع دیا جائے گا۔
