اسلام آباد۔13مارچ (اے پی پی):پاکستان نے بھارتی حکومت کی جانب سے اپنے غیر قانونی طور پر زیر تسلط جموں و کشمیر میں ممتاز سیاسی اور مذہبی رہنما میر واعظ عمر فاروق کی زیر قیادت عوامی ایکشن کمیٹی اور جموں و کشمیر اتحاد المسلمین کو پانچ سال کے لیے غیر قانونی قرار دینے کے فیصلے کی شدید مذمت کی ہے۔
دفتر خارجہ کے ترجمان شفقت علی خان نے جمعرات کو یہاں ہفتہ وار پریس بریفنگ میں کہا کہ عوامی ایکشن کمیٹی کی قیادت میر واعظ عمر فاروق کررہے ہیں جبکہ جموں و کشمیر اتحاد المسلمین کی بنیاد ایک اور قابل ذکر سیاسی اور مذہبی رہنما مولانا محمد عباس انصاری مرحوم نے رکھی تھی جنہوں نے 2022 میں اپنی وفات تک اس کی سربراہی کی۔
انہوں نے کہا کہ بھارتی حکام کے حالیہ فیصلے سے کالعدم کشمیری سیاسی جماعتوں اور تنظیموں کی مجموعی تعداد 16 ہو گئی ہے۔ ترجمان نے کہا کہ مختلف سیاسی جماعتوں اور تنظیموں پر پابندی لگانا بھارت کے غیر قانونی طور پر زیر قبضہ جموں و کشمیر میں بھارتی حکام کے انتہائی سخت رویے کا ایک اور مظہر ہے۔ انہوں نے کہا کہ یہ اقدام سیاسی سرگرمیوں اور اختلاف رائے کو دبانے کی خواہش کو بھی ظاہر کرتا ہے۔
دفتر خارجہ کے ترجمان نے کہا کہ یہ جمہوری اصولوں اور بین الاقوامی انسانی حقوق کے قانون کی سراسر بے توجہی کو بھی ظاہر کرتا ہے۔ انہوں نے بھارتی حکومت سے اپیل کی کہ وہ کشمیری سیاسی جماعتوں پر عائد پابندیاں ہٹائے، تمام سیاسی قیدیوں کی رہا کرے اور جموں و کشمیر کے بارے میں اقوام متحدہ کی سلامتی کونسل کی قراردادوں پر عمل درآمد کرے۔
Short Link: https://urdu.app.com.pk/urdu/?p=572016
