عوام جھوٹی خبریں پھیلانے والوں سے خبردار رہیں،درست معلومات کیلئے سرکاری ذرائع ابلاغ پر انحصار کیا جائے،سینئر وزیرمریم اورنگزیب

لاہور۔8مئی (اے پی پی):سینئرصوبائی وزیر مریم اورنگزیب نے کہا ہے کہ عوام جھوٹی خبریں اور اطلاعات پھیلانے والوں سے خبردار رہیں۔

جمعرات کے روز مریم اورنگزیب نے عوام سے اپیل کرتے ہوئے کہا کہ سوشل میڈیا پر نا معلوم ذرائع سے آنے والی غیر مصدقہ خبروں کو آگے پھیلانے سے اجتناب کریں،صرف آئی ایس پی آر ، وزارت اطلاعات ، ڈی جی پی آر ، ڈپٹی کمشنر کی سرکاری ویب سائٹ اور سوشل میڈیا اکائونٹس سے معلومات حاصل کی جائیں۔انہوں نے کہا کہ عوام جھوٹی خبریں اور اطلاعات پھیلانے والوں سے خبردار رہیں،درست معلومات کیلئے پی ٹی وی و دیگر سرکاری ذرائع ابلاغ پر انحصار کیا جائے ۔

مریم اورنگزیب نے کہا کہ سوشل میڈیا پر پاک بھارت کشیدگی کے حوالے سے بے شمار جعلی پوسٹ اور فیک ویڈیوز گشت کر رہی ہیں،سوشل میڈیا پر وائرل ہونے والی غلط،بے بنیاد اور جعلی اطلاعات پر یقین نہ کیا جائے اور نہ ہی بلا تصدیق فارورڈ کریں۔پبلک ایمرجنسی نوٹیفکیشن کے حوالے سے سینئر صوبائی وزیر نے کہا کہ ڈپٹی کمشنر لاہو رکی جانب سے کسی قسم کا پبلک ایمرجنسی نوٹیفکیشن جاری نہیں کیا گیا ہے۔

Short Link: https://urdu.app.com.pk/urdu/?p=594463