ریو ڈی جنیرو۔8جولائی (اے پی پی):سعودی عرب نے کہا ہے کہ اسرائیل کی جانب سے غزہ میں شہریوں اور صحت کے بنیادی ڈھانچے کو نشانہ بنانا بین الاقوامی انسانی قوانین کی کھلی خلاف ورزی اور عالمی ضوابط کو براہِ راست چیلنج کرنا ہے۔ العربیہ اردو کے مطابق یہ بات سعودی عرب کے وزیر خارجہ شہزادہ فیصل بن فرحان نے گزشتہ روز برازیل کے شہر ریو ڈی جنیرو میں منعقدہ 17ویں برکس سربراہی اجلاس کےدوران خطاب کرتے ہوئے کہی۔ انہوں نے عالمی برادری پر زور دیا کہ غزہ میں انسانی المیے کو نظر انداز نہیں کیا جا سکتا ۔
عالمی برادری اپنی ذمہ داریاں ادا کرتے ہوئے انسانی امداد کی فراہمی اور نہتے شہریوں کے تحفظ کو یقینی بنائے۔ انہوں نے کہا کہ بحران کے خاتمے اور جامع اور پائیدار امن کے قیام کے لئے بین الاقوامی برادری کو سنجیدہ اقدامات کرنے ہوں گے اور یہ امن صرف دو ریاستی حل کی بنیاد پر ہی ممکن ہے۔ سعودی عرب کو اس اجلاس میں برکس میں شمولیت کی دعوت دی گئی ہے۔ سعودی وزیر خارجہ شہزادہ فیصل بن فرحان نے کہا کہ سعودی عرب بین الاقوامی پلیٹ فارمز پر تعمیری تعاون کا خواہاں ہے تاکہ مشترکہ ترقی اور مواقع سے بھرپور مستقبل کی بنیاد رکھی جا سکے ۔
انہوں نے ماحولیاتی تبدیلیوں سے متعلق اقوام متحدہ کے فریم ورک کنونشن اور پیرس معاہدے سے سعودی عرب کی وابستگی کے عزم کا اعادہ کرتے ہوئے اس بات پر زور دیا کہ دنیا کو مختلف ممالک کے حالات کو مدنظر رکھتے ہوئے متوازن اور قابلِ عمل حکمت عملی اختیار کرنی چاہیے۔ انہوں نے کہا کہ سعودی عرب جو پانی کی قلت جیسے ماحولیاتی چیلنجز سے دوچار ہے نے اس حوالے سے جدید ٹیکنالوجی اور طریقے اپنائے ہیں۔
انہوں نے بتایا کہ مملکت نے عالمی سطح پر پانی کی منصفانہ دستیابی کو یقینی بنانے کے لئے ’’عالمی تنظیم برائے پانی‘‘ کے قیام میں کلیدی کردار ادا کیا۔ وزیر خارجہ نے سعودی وژن 2030 کے تحت صحت کے شعبے میں جاری اصلاحات پر بھی روشنی ڈالی، جن میں بیماریوں سے بچاؤ، مربوط طبی نگہداشت اور ہنگامی صورتِ حال سے نمٹنے کی استعداد میں اضافہ شامل ہے۔
انہوں نے سعودی عرب کی حج و عمرہ جیسے بڑے اجتماعات کے کامیاب انتظامات کی مثالیں پیش کرتے ہوئے بتایا کہ مملکت نے جدید منصوبہ بندی اور ابتدائی انتباہی نظاموں کو فروغ دے کر اپنی حیثیت ایک علاقائی طبی ہنگامی مرکز کے طور پر مستحکم کی ہے، جو بین الاقوامی معیار کے مطابق ہے۔
