غزہ۔20فروری (اے پی پی):غزہ میں جنگ بندی معاہدے کے تحت جمعرات کو چاراسرائیلی یرغمالیوں کی لاشیں ریڈ کراس کے حوالے کر دی گئی ہیں۔وائس آف امریکا کی رپورٹ کے مطابق جن افراد کی لاشیں ریڈ کراس کے حوالے کی گئی ہیں ان میں دو بچے، ایک خاتون اور ایک مرد شامل ہیں جنہیں سات اکتوبر 2023 کو اسرائیل پر حملے کے دوران یرغمال بنا کر غزہ منتقل کیا گیا تھا۔اس سلسلسہ میں غزہ کے علاقے خان یونس میں جمعرات کو ایک تقریب منقعد ہوئی جس میں چار تابوت ریڈ کراس حکام کے حوالے کیے گئے۔
اس موقع پر سینکڑوں افراد موجود تھے۔ جس وقت مذکورہ بچوں کو یرغمال بنایا گیا تھا اس وقت ایک بچے کی عمر 9ماہ اور دوسرے کی4سال تھی۔ یہ دونوں بچے کم عمر ترین یرغمالی تھے۔ اس کے علاوہ جو دو لاشیں ریڈ کراس کے حکام کے حوالے کی گئی ان میں سے ایک مذکورہ بچوں کی ماں شیری بباس اور ایک لاش اوڈیڈ لیف شیٹس نامی شخص کی تھی۔فلسطینی حکام کے مطابق مذکورہ بچے اوران کی ماں نومبر 2023 میں ایک اسرائیلی حملے میں ہلاک ہو گئے تھے۔
اسرائیلی حکام نے کہا ہے کہ مکمل ڈی این اے ہونے تک لاشو ں کی شناخت کی تصدیق نہیں کی جا سکتی۔غزہ میں جنگ بندی معاہدے کے تحت پہلی مرتبہ اسرائیلی یرغمالیوں کی لاشیں واپس کی گئی ہیں۔ اس سے قبل اسرائیلی یرغمالوں اور فلسطینی قیدیوں کے 6 تبادلے ہو چکے ہیں جن میں جنگ بندی کے ایک ماہ کے دوران اب تک 24 اسرائیلی یرغمالی اور ایک ہزار سے زیادہ فلسطینی قیدی رہا ہو چکے ہیں۔لاشوں کی اسرائیل آمد سے قبل اسرائیلی وزیرِ اعظم بینجمن نیتن یاہو نے ایک بیان میں کہا کہ اسرائیل کے لئے جمعرات کا دن مشکل ترین اور دکھ بھرا دن ہو گا۔
Short Link: https://urdu.app.com.pk/urdu/?p=563972
