کراچی۔ 26 فروری (اے پی پی):انسپکٹر جنرل (آئی جی) سندھ غلام نبی میمن کی زیر صدارت غیر ملکی شہریوں کی سکیورٹی پر مامور نجی سکیورٹی گارڈز سے متعلق حکومت پاکستان و سندھ کی بنائی گئی ایس او پی پر عمل درآمد کے حوالے سے جائزہ اجلاس سینٹرل پولیس آفس کراچی میں منعقدہ ہوا جس میں آل پاکستان سکیورٹی ایجنسیز ایسوسی ایشن کے چیئرمین میجر ریٹائرڈ منیر احمد نے 5رکنی وفدکے ہمراہ شرکت کی۔جاری اعلامیہ کے مطابق اجلاس کو آل پاکستان سکیورٹی ایجینسیز ایسوسی ایشن کے چیئرمین میجرریٹائرڈ منیر احمد نے حکومت پاکستان و سندھ کی ترتیب دی گئی ایس او پی پر عمل درآمد اور موجودہ صورتحال سے آگاہ کیا۔
انہوں نے کہا کہ قانون نافذ کرنے والے اداروں سے تصدیق کے بعد بھرتی اور بعدازاں غیرملکی باشندوں کی سکیورٹی پرتعینات کیئے گئے تمام نجی سکیورٹی گارڈز کا ڈیٹا مرتب کرلیا گیا ہے۔انہوں نے کہا کہ مستند اور رجسٹرڈ سکیورٹی گارڈزکو اے پی ایس ایس اے کی جانب سے "بارکوڈ”لگا سروس کارڈ اور یونیفارم بیج فراہم کیا جارہا ہے ،بار کوڈ کے ذریعے کسی بھی وقت موبائل فون ایپلیکیشن سے گارڈ کی تصدیق کی جاسکے گی۔اس موقع پر وفد نے مطالبہ کیا کہ غیر رجسٹرڈ نجی سکیورٹی کمپنیوں اور گارڈز کے خلاف قانونی کارروائی کی جائے۔اجلاس میں آئی جی سندھ نے ہدایت کی کہ نجی سکیورٹی کمپنیوں اور گارڈز سے متعلق ایس او پی پر عملدرآمد اور دیگر معاملات کیلئے ڈی آئی جی ایس پی یو کوآرڈینیشن میکنزم بنائیں۔
انہوں نے ڈی آئی جی ٹریننگ کوبھی ہدایت دی کہ اے پی ایس ایس اے کی درخواست پر کراچی اور اندرون سندھ میں قائم پولیس ٹریننگ اسکولز میں نجی گارڈز کو فائرنگ کی تربیت فراہم کی جائے۔انہوں نے کہا کہ سادہ لباس ہو یا باوردی کسی بھی سرکاری اور نجی سیکورٹی اہلکار کو اسلحہ کی نمائش کرنے کی ہر گز اجازت نہیں ہے۔آئی جی سندھ نے کہا کہ سیکیورٹی گارڈز کی بھرتی کے دوران پولیس ریکارڈ میں مطلوب ومفرور ملزمان سامنے آنیکی صورت میں حوالگی پولیس 15کے ذریعے متعلقہ تھانے کو کی جائے۔اجلا س میں ڈی آئی جیز،ہیڈکوارٹرز،آئی ٹی،ایس پی یو،ٹریننگ اور دیگر پولیس افسران نے شرکت کی۔
Short Link: https://urdu.app.com.pk/urdu/?p=566725
