اسلام آباد۔20اگست (اے پی پی):فری اینڈ فیئر الیکشن نیٹ ورک (فافن) نے الیکشن کمیشن آف پاکستان (ای سی پی )سے مطالبہ کیا ہے کہ وہ آئندہ حد بندی کی مشق کے دوران انتخابی حلقوں میں آبادی کے برابری کے اصول کو ترجیح دے۔اتوار کوایک پریس ریلیز میں کہا گیا کہ 7ویں آبادی اور مکانات کی مردم شماری-2023، کے تحت تمام شہریوں کی منصفانہ نمائندگی کو یقینی بنانے کے لیے حلقہ بندیوں میں ایڈجسٹمنٹ کی ضرورت ہے۔
فافن نےکہا کہ الیکشنز ایکٹ 2017 میں حالیہ ترامیم کی روشنی میں، جس میں سیکشن 20 (3) میں ایک نئی شق کا اضافہ بھی شامل ہے۔ای سی پی اب موجودہ ضلعی حدود پر سختی سے عمل کرنے کا پابند نہیں ہے۔ فافن نے مزید کہا کہ یہ تبدیلی حلقوں میں آبادی کے تفاوت کو 10 فیصد سے زیادہ ہونے سے روکنے کے لیے نافذ کی گئی ہے۔اس نے اس بات پر زور دیا کہ اس طرح کے اقدامات انتخابی عمل کی شفافیت کو برقرار رکھنے کے لیے ضروری ہیں، جیسا کہ آئین کے آرٹیکل 218 (3) کے تحت طے کیا گیا ہے۔
فافن نے اس بات پر روشنی ڈالی کہ حلقوں کےغیر مساوی حجم سے نہ صرف شہریوں کے برابری کے آئینی حق (آرٹیکل 25) کی خلاف ورزی ہوتی ہے بلکہ منصفانہ نمائندگی کی روح بھی مجروح ہوتی ہے۔ فافن کے مطابق سیکشن 20 (3) میں نئے پروویزو کے اندراج نے اس ضرورت کو مؤثر طریقے سے بے اثر کر دیا جس نے پہلے ای سی پی کو حد بندی کے دوران موجودہ انتظامی یونٹ کی حدود پر غور کرنے پر مجبور کیا ۔
اس میں کہا گیا ہے کہ 2022 میں قومی اور صوبائی اسمبلی کے حلقوں کی پچھلی حد بندی کے نتیجے میں 82 قومی اسمبلی اور 88 صوبائی اسمبلیوں کے حلقوں کی آبادی کا فرق متعلقہ نشستوں کے کوٹے سے 10 فیصد سے زیادہ تھا جیسے کہ NA-39 بنوں، سب سے بڑا حلقہ، سب سے چھوٹے، NA-42 ٹانک کے مقابلے آبادی میں تقریباً تین گنا بڑا تھا۔فافن نے اندازہ لگایا ہے کہ اگر اضلاع کی حدود کی پیروی کی جائے تو خیبر پختونخواہ کے دو تہائی اضلاع، سندھ کے آدھے اضلاع، پنجاب کے ایک تہائی اضلاع اور بلوچستان کے تمام اضلاع کے حلقوں میں آبادی کا فرق 10 فیصد سے زیادہ ہو سکتا ہے۔
فافن نے ای سی پی کو سفارش کی کہ سیکشن 20 (3) میں نئی شرط کے مطابق حد بندی کے لیے اپنے قوانین میں ترمیم پر غور کریں۔ خاص طور پر فافن نے ایک صوبے کے اندر آبادی کے فرق کو زیادہ سے زیادہ 10 فیصد تک محدود کرنے کے لیے قواعد 10 (4) اور 10 (5) کو تبدیل کرنے کا مشورہ دیا،مزید برآں اس نے مسودہ فہرست میں داخل کی گئی نمائندگیوں کو حل کرنے کے بعد فارم-7 (حلقوں کی حتمی فہرست) میں آبادی کے ایک تازہ ترین کالم کو شامل کرنے کا مطالبہ کیا۔
فافن نے زیادہ شفافیت ای سی پی پر زور دیا کہ وہ حد بندی کمیٹیوں کے لیے یہ لازمی بنائے کہ وہ ایسے معاملات کی تفصیلی وضاحت کریں جہاں 10 فیصد سے زیادہ فرق ہو۔ تنظیم نے حد بندی کے دوران غور کیے جانے والے عوامل کی واضح تعریف کی ضرورت پر زور دیا اور نمائندگی کے عمل کو ہموار کرنے کے لیے قواعد 12 اور 13 میں ترمیم کی سفارش کی۔
آخر میں فافن نے اس بات پر زور دیا کہ حد بندی کے عمل کو بڑھانا انتخابی شفافیت کو یقینی بنانے اور آبادی کی نمائندگی میں عدم توازن کو روکنے کے لیے اہم ہے۔ تنظیم نے اس بات پر زور دیا کہ سیاسی طاقت کی تقسیم کے لیے حد بندی ایک اہم طریقہ کار ہے اور اسے منصفانہ،آزادانہ اور شفاف طریقے سے انجام دیا جانا چاہیے۔
