پیرس/اسلام آباد۔26مارچ (اے پی پی):فرانس میں پاکستان کی سفیر ممتاز زہرا بلوچ نے پیرس میں یونیسکو کے ہیڈ کوارٹر میں منعقدہ سائنس ڈپلومیسی کے بارے میں افتتاحی عالمی وزارتی ڈائیلاگ میں پاکستانی وفد کی قیادت کی۔ فرانس میں پاکستانی سفارتخانہ کی جانب سے جاری بیان کے مطابق اس موقع پر اظہار خیال کرتے ہوئے سفیر ممتاز زہرا بلوچ نے کہا کہ سائنس ڈپلومیسی بین الاقوامی چیلنجوں کا مشترکہ حل تلاش کرنے اور عالمی امن کو فروغ دینے کی کلید ہے۔
انہوں نے کہا کہ گلوبل سائوتھ کو عالمی سائنسی ادارے میں مکمل شرکت کے لیے نظامی رکاوٹوں کا سامنا کرنا پڑتا ہے، اس تقسیم کو ختم کرنے، سائنسی تعاون کو فروغ دینے اور سائنسی ترقی اور اختراع کو جمہوری بنانے کی ضرورت ہے۔ سفیر ممتاز زہرا بلوچ نے کہا کہ سائنس ڈپلومیسی میں پاکستان کا سفر عالمی علم کے اشتراک، باہمی تحقیق اور سماجی و اقتصادی ترقی کے لیے سائنسی اختراعات کے فروغ کے لیے اس کے عزم کو ظاہر کرتا ہے۔ انہوں نے کہا کہ بین الاقوامی برادری کو سائنس میں تعمیری شراکت داری قائم کرنے سمیت کھلی اور محفوظ سائنس کو آگے بڑھانے کے لیے گلوبل کمپیکٹ کی طرف بڑھنے کی ضرورت ہے۔
Short Link: https://urdu.app.com.pk/urdu/?p=576479
