اسلام آباد۔2ستمبر (اے پی پی):فضائیہ میڈیکل کالج (ایف ایم سی)، ایئر یونیورسٹی نے پاکستان مارشل آرٹس ایسوسی ایشن اور آئی ایف ایم ایس اے پاکستان کے تعاون سے خواتین کے لئے دو روزہ سیلف ڈیفنس ورکشاپ کا کامیاب انعقاد کیا جسے طلبہ، اساتذہ اور ماہرین نے بے حد سراہا۔ورکشاپ کا آغاز پرنسپل فضائیہ میڈیکل کالج میجر جنرل (ر) محمد طاہر خادم کی سرپرستی میں ہوا۔ اپنے افتتاحی خطاب میں انہوں نے اس اقدام کو خواتین کے لئے ’’اعتماد کی ڈھال‘‘ قرار دیا۔
انہوں نے کہا کہ آج کے دور میں جب خواتین کو عوامی مقامات پر مختلف چیلنجز کا سامنا ہے اس قسم کی تربیت نہایت ضروری ہے، ہر شریک طالبہ یہاں سے زیادہ مضبوط، زیادہ باہمت اور زندگی کے لئے بہتر تیار ہو کر جائے گی۔ انہوں نے مزید کہا کہ ذہنی مضبوطی تعلیمی کامیابی کی طرح پاکستان کی نوجوان نسل کے لئے ناگزیر ہے۔
وائس پرنسپل ایف ایم سی بریگیڈیئر (ر)پروفیسر محمد مظہر حسین نے ورکشاپ کو ایک انقلابی قدم قرار دیتے ہوئے کہا کہ یہ صرف تربیت نہیں تھی بلکہ ایک تبدیلی تھی، اپنی بیٹیوں کو بلاک، ڈس آرم اور خود کا دفاع کرتے دیکھنا ہم سب کے لئے باعثِ فخر لمحہ تھا، پاکستان کو مزید ایسے اقدامات کی ضرورت ہے اور ایف ایم سی اس کارِ خیر کا حصہ بننے پر فخر محسوس کرتا ہے۔ پاکستان سپورٹس بورڈ سے قرۃ العین نے کلیدی خطاب کیا جس کا موضوع تھا "حوصلہ متعدی ہے”۔
انہوں نے کہا کہ جب ایک خاتون اپنے دفاع کی صلاحیت حاصل کرتی ہے تو وہ دس دیگر خواتین کے لئے امید کی کرن بن جاتی ہے۔ورکشاپ کی عملی تربیت کی قیادت پی ایم اے اے کے صدر اور چیف ٹرینر انور محی الدین نے کی جن کی معاونت وائس پریذیڈنٹ فائزہ راشد اور انسٹرکٹرز سمیعہ، سارہ گل، نورالہدیٰ اور ماہین شیخ نے کی۔ روایتی مارشل آرٹس ڈیمانسٹریشن کے برعکس اس تربیت میں حقیقی زندگی کے دفاعی طریقے شامل تھے جیسے کہ چھری چھیننا، پستول سے بچاؤ، پریشر پوائنٹ سٹرائیکس اور صورتحال کا درست اندازہ لگانا۔انور محی الدین نے شرکاء کو بتایا کہ سیلف ڈفنس جارحیت نہیں بلکہ بقا ء اور عزتِ نفس کا نام ہے،
یہاں ہر نوجوان لڑکی صرف حرکات نہیں بلکہ اپنے مستقبل کی حفاظت کرنا سیکھ رہی ہے۔اس ورکشاپ میں ملک کی نامور جامعات جیسے نسٹ، فاسٹ، این ڈی یو، بحریہ یونیورسٹی، ایئر یونیورسٹی، آئی آئی یو آئی، فیڈرل میڈیکل اینڈ ڈینٹل کالج اور خود ایف ایم سی کے طلبہ نے پرجوش شرکت کی۔تقریب کی خاص بات سیرین ایئر کی دو سینئر خواتین افسران عائشہ فاروق (منیجر فلائٹ سروسز) اور سونینا یونس (منیجر فلائٹ آپریشنز) کی شرکت تھی۔ دونوں مہمانوں نے اس اقدام کو بے حد سراہا۔ عائشہ فاروق نے کہا کہ جس پروفیشنل انداز سے تربیت دی گئی
اور طالبات نے اعتماد کا مظاہرہ کیا وہ حیران کن ہے، جیسے ایوی ایشن میں حفاظت اولین ترجیح ہے، ویسے ہی روزمرہ زندگی میں ہر خاتون کو اپنے دفاع کی صلاحیت آنی چاہئے، سیلف ڈیفنس کو ہر ادارے کے نصاب کا حصہ بنایا جانا چاہئے۔ انہوں نے مزید اعلان کیا کہ سیرین ایئر جلد ہی پی ایم اے اے کے تعاون سے کراچی، لاہور اور اسلام آباد میں اپنی خواتین عملے کے لئے خصوصی سیلف ڈیفنس پروگرام کا آغاز کرے گی۔ سونینا یونس نے بھی کہا کہ یہ پروگرام محض دفاعی تکنیک نہیں بلکہ ہمت سکھاتا ہے، ایسے اقدامات کو قومی سطح پر فروغ دینا چاہئے۔ ورکشاپ ایک شاندار اختتامی تقریب پر مکمل ہوئی جس میں شرکاء میں اسناد اور انعامات تقسیم کئے گئے۔
