جدہ ۔8مارچ (اے پی پی):نائب وزیراعظم اور وزیر خارجہ محمد اسحاق ڈار نے مسلم امہ پر زور دیا ہے کہ فلسطینی عوام کی غزہ یا مغربی کنارے سے زبردستی نقل مکانی کو نسلی تعصب کی بنیاد پر بے دخلی اور بین الاقوامی قوانین کے تحت جنگی جرم قرار دیا جائے، او آئی سی کو کسی بھی ایسی تجویز کو واضح طور پر مسترد کرنا چاہیے جو فلسطینیوں کو ان کے اپنے وطن سے نکالنے کی کوشش ہو، کسی بیرونی طاقت کو فلسطینیوں پر اپنا مستقبل ٹھوسنے کا کوئی حق نہیں ہے، انہیں خود ارادیت کے ذریعے اپنے مستقبل کا خود تعین کرنا چاہیے۔
او آئی سی کو کسی بھی مذموم ایجنڈے کے خلاف متحد ہونا چاہیے جس کا مقصد مقبوضہ فلسطینی علاقوں کی آبادی کو تبدیل کرنا ہے۔ترجمان دفتر خارجہ کی جانب سے ہفتہ کو یہاں جاری اعلامیہ کے مطابق ان خیالات کا اظہار نائب وزیراعظم اور وزیر خارجہ محمد اسحاق ڈار نے جدہ، سعودی عرب میں منعقدہ اسلامی تعاون تنظیم (او آئی سی) وزرائے خارجہ کی کونسل کے غیر معمولی اجلاس کے موقع پر کیا۔
نائب وزیر اعظم نے پاکستان کی جانب سے فوری سفارشات بھی پیش کیں جن میں جنگ بندی معاہدے پر تین مراحل میں مکمل اور فوری عمل درآمد شامل ہے ، دشمنی کا مستقل خاتمہ، غزہ سے اسرائیلی افواج کا مکمل انخلا، غیر محدود انسانی امداد تک رسائی اور تعمیر نو کا ایک جامع منصوبہ بھی پاکستان کی تجاویز کا حصہ ہے۔
نائب وزیراعظم اور وزیر خارجہ محمد اسحاق ڈار نے مزید کہا کہ پاکستان نے اقوام متحدہ کی سلامتی کونسل کی قرارداد 2735 (2024) پر عمل درآمد کے مطالبے کی مکمل حمایت کی ہے۔انہوں نے کہا کہ مغربی کنارے میں اسرائیلی جارحیت ختم ہونی چاہیے۔ جنین، تلکرم، نور الشمس اور الفارع میں پناہ گزین کیمپوں کی تباہی نے غزہ کی تباہی کی عکاسی کرتے ہیں۔
انہوں نے مطالبہ کیا کہ جبری نقل مکانی، غیر قانونی قبضے اور آباد کاروں پر تشدد کو اقوام متحدہ کی سلامتی کونسل کی قراردادوں 2720 (2024) اور 2334 (2016)کے مطابق تبدیل کیا جانا چاہیے۔ انہوں نے زور دے کر کہا کہ الحر م الشریف/مسجد اقصیٰ کی قانونی اور تاریخی حیثیت کو برقرار رکھا جانا چاہیے۔
محمد اسحاق ڈار نے کہا کہ فلسطینیوں کو وسیع اور بلا روک ٹوک انسانی امداد ملنی چاہیے۔ UNRWA کو بغیر کسی رکاوٹ کے کام کرنے کی اجازت ہونی چاہیے۔ اقوام متحدہ کے چارٹر کے آرٹیکل 2 (5) کے تحت اسرائیل کا قانونی فرض تھا کہ وہ اس کام میں آسانی پیدا کرے۔ انہوں نے کہا کہ اقوام متحدہ کی جنرل اسمبلی کی قرارداد A/RES/79/232 (2024) اس ذمہ داری کو تقویت دیتی اور انسانی امداد میں رکاوٹ ڈالنے کی تمام کوششوں کی مذمت کرتی ہے۔
انہوں نے کہا کہ امدادی اداروں کو جان بوجھ کر نشانہ بنانا ایک غیر اخلاقی عمل اور بین الاقوامی قانون کی خلاف ورزی ہے، انسانی امداد کو کبھی بھی ہتھیار نہیں بنانا چاہیے۔انہوں نے کہا کہ فلسطینیوں کی جبری نقل مکانی کو سرخ لکیر کے طور پر تسلیم کیا جانا چاہیے۔
نائب وزیراعظم اور وزیر خارجہ نے امت مسلمہ پر زور دیا کہ او آئی سی کو اجتماعی طور پر فلسطینیوں کو ان کے آبائی وطن سے منتقل کرنے کی کسی بھی کوشش کی مخالفت اور روکنا چاہیے، چاہے وہ براہ راست جبر کے ذریعے ہو یا انسانی امداد اور تعمیر نو کی آڑ میں ہو۔ اس طرح کا کوئی بھی اقدام نسلی تعصب کی بنیاد پر بے گھر کرنے کا عمل اور بین الاقوامی قانون کی سنگین خلاف ورزی ہے۔
انہوں نے مزید کہا کہ دو ریاستی حل کی جانب ایک قابل اعتماد اور ناقابل واپسی سیاسی عمل کی بحالی اور 1967 سے پہلے کی سرحدوں کے اندر ایک آزاد، خودمختار فلسطینی ریاست کے قیام کو یقینی بنانا ہوگا، جس کا دارالحکومت القدس الشریف ہو،یہی پائیدار امن کا واحد قابل عمل حل ہے۔ انہوں نے مزید کہا کہ او آئی سی کو فلسطین کی ریاست کو اقوام متحدہ کے مکمل رکن کے طور پر تسلیم کرانے کے لیے بھی اپنے اجتماعی اثر و رسوخ کو متحرک کرنا چاہیے۔
فرانس اور سعودی عرب کی مشترکہ صدارت میں جون میں ہونے والی آئندہ کانفرنس کے حوالہ سے اسحاق ڈار نے کہا کہ یہ کانفرنس مسئلہ فلسطین کے پرامن اور دو ریاستی حل کے نفاذ کے لیے ایک اہم موقع ہوگا۔انہوں نے کہا کہ او آئی سی کو غزہ اور مغربی کنارے میں اسرائیل کو اس کے جرائم کا جوابدہ ٹھہرانے کے لیے فیصلہ کن سفارتی اور اقتصادی اقدامات کرنے چاہئیں۔ اس میں تجارتی پابندیاں، مسلسل سفارتی دباؤ اور بین الاقوامی عدالت انصاف میں قانونی کارروائی شامل ہونی چاہیے۔
نائب وزیر اعظم و وزیر خارجہ نے کہا کہ پاکستان نے عرب جمہوریہ مصر کی طرف سے غزہ کی تعمیر نو کے منصوبے کا خیرمقدم کیا اور کہا کہ یہ منصوبہ غزہ کی تعمیر نو کے لیے ایک متوازن، عملی اور موثر طریقہ کار پیش کرتا ہے،یہ حقیقت کہ فلسطینیوں کو اس منصوبے کو حتمی شکل دینے میں شامل کیا گیا ہے اور ان کے مستقبل کی تشکیل میں کلیدی کردار ادا کرنے کا تصور کیا گیا ہے، اس سے اس منصوبے کو مزید تقویت ملتی ہے۔
اس سے فلسطین کے مسئلے پر اسلامی یکجہتی اور اتفاق رائے کا اظہار بھی ہوتا ہے۔ محمد اسحاق ڈار نے اس بات پر افسوس کا اظہار کیا کہ بین الاقوامی انسانی قانون مقبوضہ فلسطینی علاقے میں حملے کی زد میں ہے جسے بند ہونا چاہیے۔ اسرائیل کو اس کی سنگین خلاف ورزیوں اور سنگین خلاف ورزیوں کے لیے جوابدہ ہونا چاہیے، کیونکہ اس نے بین الاقوامی انسانی قانون کو جان بوجھ کر اور بے جا نظر انداز کیا ہے۔
انہوں نے کہا کہ اقوام متحدہ کی جنرل اسمبلی نے گزشتہ سال چوتھے جنیوا کنونشن کے لیے اعلیٰ سطح پر معاہدہ کرنے والی جماعتوں کی کانفرنس بلانے کا حکم دیا تھا، ہمیں افسوس ہے کہ ہماری توقعات کے برعکس یہ کانفرنس جنیوا میں منعقد نہیں ہو سکی اور اپنے مینڈیٹ کو پورا نہیں کر سکی۔نائب وزیراعظم وزیر خارجہ نے کہا کہ غزہ اپنی تاریخ کے سیاہ ترین ادوار میں سے ایک دور سے گزر رہا ہے۔
انہوں نے کہا کہ 48 ہزار سے زیادہ بے گناہ فلسطینیوں، جن میں زیادہ تر خواتین اور بچے شامل ہیں ان کو بے رحمی اور سفاکی سے شہید کیا گیا ہے۔ غزہ کا 90 فیصد سے زیادہ بنیادی ڈھانچہ بشمول گھر، سکول، ہسپتال، کاروبار اور عبادت گاہیں ملبے میں تبدیل ہو چکی ہیں۔یہ صرف تباہی نہیں ہے بلکہ پوری قوم کے وجود پر حملہ ہے۔ فلسطینیوں پر ڈھائے جانے والے مصائب قابل مذمت ہیں جو مسلم دنیا سے فوری، فیصلہ کن اور متحد اقدام کا مطالبہ کرتے ہیں۔
انہوں نے مصر، قطر اور امریکہ کی طرف سے جنگ بندی کیلئے سہولت فراہم کرنے پر بھی خیرمقدم کیا جس سے امید کی کرن روشن ہوئی۔ انہوں نے خبردار کیا کہ صورت حال نازک ہے کیونکہ معاہدے پر عمل درآمد سے متعلق غیر یقینی صورتحال سے مستقل اور منصفانہ امن کی فوری ضرورت مزید واضح ہوئی ہے۔ نائب وزیراعظم و وزیر خارجہ محمد اسحاق ڈار نے رمضان کے مقدس مہینے کے دوران غزہ میں انسانی امداد کی ترسیل کو روکنے کی شدید مذمت کرتے کرتے ہوئے کہا کہ امداد روکنا جنگی جرم ہے۔ اسرائیل غزہ میں انسانی تباہی کو مزید بڑھا رہا ہے جہاں لوگوں کی اکثریت اپنی بقا کے لیے امداد پر انحصار کرتی ہے۔
انہوں نے کہا کہ فلسطین کو بچانے کے لیے ایک اجتماعی جدوجہد کی ضرورت ہے۔انہوں نے زور دیا کہ اسرائیل کی جنگ کو بحال کرنے اور تشدد کی مہم دوبارہ شروع کرنے کی خواہش کو متحد ہ عزم کے ساتھ ناکام بنایا جانا چاہیے۔انہوں نے کہا کہ جب تک مقبوضہ مغربی کنارے میں اسرائیل کی کارروائیاں جاری رہیں گی امن پائیدار نہیں ہو سکتا۔ ہر گزرتے دن کے ساتھ فوجی چھاپے، آباد کاروں پر تشدد اور غیر قانونی قبضے میں شدت آتی گئی اور یہ الگ تھلگ واقعات نہیں ہیں بلکہ فلسطینیوں کی شناخت کو ان کی اپنی سرزمین سے مٹانے کی دانستہ حکمت عملی کا حصہ ہیں۔ یہ حقیقی طور پر نسلی تطہیر ہے ۔
اس موقع پر پاکستان کی جانب سے اسرائیلی وزیراعظم کے اس متکبرانہ بیان کی بھی شدید مذمت کی گئی جس میں سعودی عرب میں فلسطینی ریاست کے قیام کی تجویز دی گئی تھی۔ انہوں نے کہا کہ یہ پوری امت مسلمہ کی توہین ہے۔انہوں نے کہا کہ پاکستان سعودی عرب کے ساتھ مکمل یکجہتی کا اظہار کرتا ہے اور فلسطینی کاز کے لیے اس کی مستقل حمایت کو سراہتا ہے۔انہوں نے کہا کہ پاکستان نے شام میں ایک جامع، شامی اور مقامی قیادت میں سیاسی عمل کے ذریعے استحکام کی حمایت کی ہے۔
