اسلام آباد۔27اپریل (اے پی پی):کامسٹیک اور ایبٹ آباد یونیورسٹی برائے سائنس و ٹیکنالوجی کے مابین مفاہمتی یادداشت ( ایم او یو )کامقصد فلسطینی طلباء و طالبات کو تعلیم کے زیور سے آراستہ کرنا ہے،مفاہمت کی یادداشت پر دستخط کرنے کی تقریب کامسٹیک سیکرٹریٹ اسلام آباد میں ہوئی۔ تقریب میں وائس چانسلر ایبٹ آباد یونیورسٹی پروفیسر ڈاکٹر ملک مجدد الرحمن ، کو آرڈینیٹر جنرل کامسٹیک پروفیسر ڈاکٹر محمد اقبال چوہدری سمیت کامسٹیک و ایبٹ آباد یونیورسٹی کے حکام بھی موجود تھے۔
مفاہمت کی یاداشت کے تحت ایبٹ آباد یونیورسٹی برائے سائنس و ٹیکنالوجی کامسٹیک کے فیلوشپ پروگرام برائے فلسطین کے تحت فلسطینی طلباء کو آن لائن اور آن کیمپس دونوں طریقوں سے اعلیٰ تعلیم کے مواقع فراہم کرے گی۔یونیورسٹی کی جانب سے انڈر گریجویٹ پروگراموں کے لیے 40 سکالرشپس دی جائیں گی جن میں ڈاکٹر آف فزیو تھراپی، ڈاکٹر آف فارمیسی، بی ایس میڈیکل لیبارٹری ٹیکنالوجی (ایم ایل ٹی)، بی ایس مائکرو بایولوجی، بی ایس فوڈ سائنسز، بی ایس کمپیوٹر سائنس، اور بی ایس سافٹ ویئر انجینئرنگ شامل ہیں۔
مزید برآں کمپیوٹر سائنس اور سافٹ ویئر انجینئرنگ میں فری لانسنگ پروگرام آن لائن بھی دستیاب ہونگے اور ضروری ڈیجیٹل مہارتوں سے آراستہ کرنے کے لیے 2,000 زائد فلسطینی طلبہ کو تربیت دے جائے گی۔مفاہمت کی یادداشت کا مقصد فلسطینی طلبہ کو تعلیم و تربیت کے مواقع فراہم کرنے کے لیے نہ صرف کامسٹیک بلکہ پاکستان، پاکستانی جامعات اور عوام کے عزم کی عکاسی کرتا ہے کہ وہ اپنے فلسطینی بھائیوں کے ساتھ شابہ بشانہ کھڑے ہیں۔
Short Link: https://urdu.app.com.pk/urdu/?p=588539
