فیصل آباد۔ 24 اپریل (اے پی پی):وزارت توانائی پاور ڈویژن کی ہدایات پر فیسکوریجن کے آٹھوں اضلاع فیصل آباد، جھنگ، ٹوبہ ٹیک سنگھ، چنیوٹ، سرگودھا، میانوالی، خوشاب، بھکرمیں بجلی چوروں کے خلاف بھرپور کریک ڈاؤن جاری ہے۔فیسکو کے ترجمان سعید رضا نے اے پی پی کو بتایا کہ چیف ایگزیکٹو فیسکو انجینئر محمد عامر کی ہدایات پر فیسکو ریجن کے چھ آپریشن سرکلز میں بجلی چوری کے خلاف کارروائیوں کے دوران گزشتہ روز مزید45بجلی چور پکڑے گئے جن کو62 ہزار سے زائد ڈی ٹیکشن یونٹس اور19لاکھ93ہزار سے زائدکا جرمانہ عائد کیاگیا ہے۔
انہوں نے بتایا کہ فیسکو ریجن میں بجلی چوری کے خلاف جاری خصوصی مہم کے دوران اب تک کل18177بجلی چور پکڑے گئے جن کو4 کروڑ31لاکھ66 ہزارسے زائدڈی ٹیکشن یونٹس پر مشتمل 2 ارب1 کروڑ33لاکھ سے زائدکاجرمانہ عائدکیاگیا ہے۔مذکورہ بجلی چور ڈائریکٹ سپلائی،شنٹ سسٹم،میٹر کی باڈی میں سوراخ کرکے،میٹر کو سلو کرکے اور مختلف طریقوں سے بجلی چوری کے مرتکب پائے گئے۔
انہوں نے بتایا کہ بجلی چوری میں 18900گھریلو،599کمرشل،578زرعی اور100انڈسٹریل کنکشنز ملوث پائے گئے۔ان میں سے 18147بجلی چوروں کے خلاف مقدمات کے اندراج کیلئے درخواستیں دائر کردی گئی ہیں جبکہ 17593کے خلاف بجلی چوری کے نئے ترمیمی ایکٹ کے تحت مقدمات کا اندراج ہوگیاہے جن میں سے 13444بجلی چور قانون کی گرفت میں آچکے ہیں۔انہوں نے بتایا کہ فیسکوفرسٹ سرکل سے اب تک4273بجلی چوروں کوایک کروڑایک لاکھ32ہزار سے زائد ڈی ٹیکشن یونٹس اور48کروڑ83لاکھ سے زائد کا جرمانہ عائدکیاگیا۔
فیسکوسیکنڈسرکل سے3573بجلی چوروں کو92لاکھ90ہزار سے زائدسے زائد ڈی ٹیکشن یونٹس اور40کروڑ85لاکھ سے زائد کا جرمانہ عائدکیاگیا۔فیسکوجھنگ سرکل سے کل1999بجلی چوروں کو51 لاکھ31ہزارسے زائد ڈی ٹیکشن یونٹس اور17کروڑ78لاکھ سے زائد کا جرمانہ عائدکیاگیا۔انہوں نے بتایا کہ فیسکوسرگودھا سرکل سے2705بجلی چوروں کو71لاکھ75ہزارسے زائد ڈی ٹیکشن یونٹس اور36کروڑ13لاکھ سے زائد کا جرمانہ عائدکیاگیا۔
فیسکومیانوالی سے کل4505بجلی چوروں کو89لاکھ70ہزارسے زائد ڈی ٹیکشن یونٹس اور44کروڑ93لاکھ سے زائد کا جرمانہ عائدکیا گیا۔فیسکوٹوبہ ٹیک سنگھ سرکل سے کل1122بجلی چوروں کو24لاکھ66ہزارسے زائد ڈی ٹیکشن یونٹس اور 12کروڑ79لاکھ سے زائد کا جرمانہ عائدکیاگیا۔
انہوں نے بتایا کہ مذکورہ بجلی چوروں کے میٹر و دیگر فیسکو تنصیبات موقع سے اتار لی گئی ہیں اورچیف ایگزیکٹو فیسکوانجینئر محمد عامر کی خصوصی ہدایت پرفیسکوریجن میں بجلی چوری کے خلاف زیروٹالرینس پالیسی اپنائی گئی ہے اوربلا امتیاز بھرپور کارروائیاں کی جارہی ہیں۔دریں اثناچیف ایگزیکٹو انجینئر محمد عامر کاکہنا ہے کہ بجلی چوری ایک قومی جرم ہے جسے جڑ سے اکھاڑنا نہایت ضروری ہے۔
انہوں نے کہا کہ فیسکو ریجن سے آخری بجلی چورکے پکڑے جانے تک یہ کارروائیاں جاری رہیں گی کیونکہ بجلی چورملک و قوم کے مجرم ہیں۔انہوں نے عوام الناس سے بھی اپیل کی کہ وہ اپنے گردونواح میں بجلی چوری کی واردات پر گہری نظر رکھیں اور کسی قسم کی مشتبہ سرگرمی کی فوری اطلاع فیسکو کی ہیلپ لائن یا اپنے بل پر موجود دفاتر کے نمبر پر دیں تاکہ اس قومی جرم کا خاتمہ کیاجاسکے۔
Short Link: https://urdu.app.com.pk/urdu/?p=587106
