فیصل آباد ۔ 15 جنوری (اے پی پی):ڈپٹی ڈائریکٹر کمپلینٹس فیسکو حافظ شہزادنے بتایا کہ پاور انفارمیشن ٹیکنالوجی کمپنی نے فیسکو کے کال سنٹر 118کی ماہانہ کارکردگی رپورٹ جاری کر دی ہے جس کے مطابق کسٹمر کمپلینٹ مینجمنٹ سسٹم 118کو ماہ دسمبر میں 24643شکایات موصول ہوئیں جن کا فوری ازالہ کیا گیا۔
انہوں نے اے پی پی کو بتایا کہ فیسکو فرسٹ سرکل کو5366شکایات، سیکنڈ سرکل کو7807، جھنگ سرکل کو1527، سرگودھا سرکل کو5545 میانوالی سرکل کو1448او ر ٹوبہ ٹیک سنگھ سرکل کو2950شکایات موصول ہوئیں جن میں صارفین کے نئے کنکشنز، تاروں کی تبدیلی اوردیگر تکنیکی شکایات شامل ہیں۔
حافظ شہزاد نے بتایاکہ چیف ایگزیکٹو فیسکو انجینئرمحمد عامر کی ہدایت پر فیسکو ہیڈکوارٹرز میں مرکزی کمپلینٹ سنٹر 24گھنٹے صارفین کی شکایات کے ازالے کیلئے کوشاں اور ہیلپ لائن 118مکمل طور پر فعال ہے جس پر صارفین ہمہ قسم کی شکایات کا اندراج کروا سکتے ہیں جبکہ صارفین کی سہولت کیلئے ایس ایم ایس سروس 8118بھی کام کر رہی ہے جس پر میسج کر کے بھی صارفین اپنی شکایات کا ازالہ کر وا سکتے ہیں۔
انہوں نے مزید کہا کہ فیسکو افسران و ملازمین مل کر کمپنی کے اچھے امیج کیلئے کام کریں اور کسٹمر کئیر کو اپنی اولین ترجیح بنا لیں کیونکہ ایک مطمئن صارف ہی کمپنی کی بہترین کارکردگی کا عکاس ہوتا ہے۔
انہوں نے متعلقہ حکام کو ہدایت کی کہ صارفین کے مسائل حل کرنے کیلئے متحرک ہو جائیں اور ان کی بجلی سے متعلقہ شکایات کے فوری ازالہ کو ترجیح دیں۔
