فیصل آباد۔ 07 جنوری (اے پی پی):محکمہ زراعت نے پنجاب کے جنوبی اضلاع میں 31 جنوری اور وسطی و شمالی اضلاع میں 15 فروری تک سورج مکھی کی 88.5 ہزارایکڑ سے زائد رقبے پر کاشت کا ہدف مقررکیا ہے جہاں سے 65 ہزار ٹن سے زائدپیداوار حاصل ہونے کا امکان ہے۔نظامت زرعی اطلاعات محکمہ زراعت توسیع فیصل آباد کے ترجمان نے بتایا کہ ملک میں اس وقت 34 فیصد خوردنی تیل پیدا ہوتا ہے جبکہ 66 فیصد بیرونی ممالک سے درآمد کرنا پڑتا ہے جس پر سالانہ اربوں روپے خرچ ہو رہے ہیں انہوں نے کہاکہ سورج مکھی ایک ایسی فصل ہے جس کی کاشت کو فروغ دے کر خوردنی تیل کی پیداوار میں اضافہ اور قیمتی زرمبادلہ بچایا جاسکتا ہے۔ انہوں نے کہا کہ سورج مکھی کے بیج میں تقریباً 40 فیصد اعلیٰ معیار کا خوردنی تیل پایا جاتا ہے
اور اس کے مقابلے میں سرسوں کے بیج میں 32 فیصد اور کپاس کے بیج میں 10 سے 12 فیصد خوردنی تیل پایا جاتا ہے اس لحاظ سے بھی خوردنی تیل میں خود کفالت حاصل کرنے کےلئے سورج مکھی کی فصل پر زیادہ انحصار کرنے کی ضرورت ہے۔ انہوں نے بتایاکہ اس کے بیجوں میں 40 سے 48 فیصد تک اعلیٰ قسم کا تیل پایا جاتا ہے جس میں کثیر مقدار میں غیر سیر شدہ فیٹی ایسڈ پائے جاتے ہیں جو دل کی بیماریوں سے حفاظت کے علاوہ انسانی خوراک کے لئے ضروری حیاتین اے ، بی اور کے ہونے کے باعث انسانی صحت کے حوالے سے انتہائی معیاری گردانا جاتا ہے۔انہوں نے کہاکہ دوغلی اقسام کے بیجوں کے استعمال سے اس کی پیداوار میں اضافہ ہو اہے لیکن ہمارے ملک میں اس کی اوسط فی ایکڑ پیداوار ترقی یافتہ ممالک کی نسبت کم ہے۔
Short Link: https://urdu.app.com.pk/urdu/?p=543321
