فیصل آباد۔ 23 اکتوبر (اے پی پی):نظامت زرعی اطلاعات محکمہ زراعت کے ماہرین نے کاشتکاروں کو السی کی کاشت فوری شروع کرنے کی ہدایت کی ہے۔ انہوں نے کہاکہ السی کی بروقت کاشت مکمل ہونے کی صورت میں بہتر پیداوار کا حصول ممکن ہو سکے۔ انہوں نے کہا کہ السی کی کاشت وسط نومبر تک مکمل کی جاسکتی ہے۔
انہوں نے کہاکہ السی کی کاشت کے لئے درمیانی میرازمین کا انتخاب انتہائی اہمیت کا حامل ہے۔ انہوں نے کہاکہ کاشتکار السی کی منظور شدہ قسم چاندنی 1988کی کاشت کےلئے زمین میں 2سے 3 مرتبہ مٹی پلٹنے والا ہل چلاکر اسے 2سے 3 مرتبہ سہاگہ دیں تاکہ زمین نرم و بھربھری ہونے کے ساتھ ساتھ بہتر طور پر تیار ہو سکے۔
انہوں نے بتایاکہ السی کی فصل کو بذریعہ ڈرل کاشت کرتے ہوئے اس کی قطاروں کا درمیانی فاصلہ 30 سینٹی میٹر تک ہونا چاہیے۔
انہوں نے بتایاکہ نہری علاقوں میں 6کلو گرام فی ایکڑ اور بارانی علاقوں میں 8کلوگرام فی ایکڑ بیج ڈال کر بمپر کراپ حاصل کی جاسکتی ہے۔ انہوں نے بتایاکہ اس ضمن میں مزید رہنمائی و مشاورت کے لئے ماہرین زراعت یا محکمہ زراعت کے فیلڈ سٹاف سے بھی رابطہ کیاجاسکتاہے۔
Short Link: https://urdu.app.com.pk/urdu/?p=515920
