فیصل آباد۔ 30 مئی (اے پی پی):محکمہ زراعت نے چارے کے کاشتکاروں کو جوار کی فصل کی دوسری کٹائی رواں ماہ کے دوران پھول نکلنے سے پہلے مکمل کرنے کی ہدایت کی ہے۔ نظامت زرعی اطلاعات محکمہ زراعت فیصل آباد کے ترجمان نے کہا ہے کہ پھول نکلنے سے پہلے فصل کاٹنے پر مناسب غذائیت اور زیادہ پیداوار حاصل ہوتی ہے نیز جوار کی دوسری کٹائی سے 600 سے 800 من فی ایکڑ پیداوار حاصل ہو سکتی ہے تاہم فصل کو دیر سے کاٹنے کی صورت میں غذائیت کم ہونے کے ساتھ ساتھ پیداوار بھی کم ہو جاتی ہے۔
انہوں نے کہا کہ کٹائی کے بعد جوار چارے کی فصل کو ہرہفتے پانی دینا چاہئے تاکہ فصل کو سوکھنے اور کسی بھی قسم کی بیماری سے بچایا جاسکے۔ انہوں نے کہا کہ موسم گرما میں چارے کی قلت پیدا ہو جاتی ہے لہٰذا بروقت سبز چارے کی کاشت اور محکمہ زراعت کے مشاورتی اقدامات پر عمل درآمد کر کے بہتر پیدا وار کا حصول ممکن بنایا جا سکتا ہے۔
