فیصل آباد۔ 31 جنوری (اے پی پی):محکمہ زراعت نے کاشتکاروں کوسورج مکھی کابیج تر وتر حالت میں کاشت کرنے کی ہدایت کی ہے۔اسسٹنٹ ڈائریکٹرمحکمہ زراعت توسیع فیصل آبادڈاکٹر عامر صدیق نے کہا کہ بیج کی گہرائی زیادہ سے زیادہ 2انچ رکھی جائے تاکہ اس کی بہتر نشو ونما میں مدد مل سکے نیز اگر کھیلیوں پر سورج مکھی کابیج کاشت کرناہوتو کھیلیاں آلو کاشت کرنے والے رجر سے شرقاً و غرباً نکالی جائیں اور پہلے کھیلیوں میں پانی لگایاجائے اور پھر جہاں تک وتر پہنچے اس سے تھوڑااوپر خشک مٹی میں جنوب کی طرف بیج لگایا جائے۔
انہوں نے کہا کہ آج کل سورج مکھی کی بہاریہ کاشت کاعمل جاری ہے جسے فروری کے آخر تک کاشت کیا جا سکتا ہے۔ انہوں نے بتایاکہ سورج مکھی کی شاندار پیداوار حاصل کرنے کے لئے اس کی صحیح وقت پر کاشت انتہائی ضروری ہے۔
انہوں نے کہاکہ اگر کاشتکار ربیع فصل بالخصوص گندم کی فصل کسی بھی وجہ سے وقت پر کاشت نہ کرسکے ہوں تو وہ سورج مکھی کی کاشت سے خاطر خواہ آمدنی حاصل کرسکتے ہیں۔ انہوں نے بتایاکہ سورج مکھی کی فصل صر ف بھاری میرا زمین میں ہی کاشت کی جاسکتی ہے۔ انہوں نے بتایاکہ مزید رہنمائی کے لئے محکمہ زراعت کے فیلڈ سٹاف یا ماہرین زراعت سے بھی رابطہ کیاجاسکتاہے۔
Short Link: https://urdu.app.com.pk/urdu/?p=554300
