فیصل آباد، باغبانوں کوسفیدہ، سرخا، گولا،چھوٹی صراحی، صراحی، کریلا، حفصی اور ٹھنڈ آرام امرود کی اقسام کاشت کرنے کی ہدایت

فیصل آباد۔ 29 اگست (اے پی پی):زرعی ماہرین نے امرود کی بہتر پیداوار کے لیے باغبانوں کو سفیدہ، سرخا، گولا،چھوٹی صراحی، صراحی، کریلا، حفصی اور ٹھنڈ آرام امرود کی اقسام کاشت کرنے کی ہدایت کی ہے۔ریسرچ انفارمیشن یونٹ آری فیصل آباد کے مطابق پاکستان میں امرود کازیر کاشت رقبہ 66662 ہیکٹرز اور پیداوار4 لاکھ 95ہزار 229 ٹن سے تجاوز کر گئی ہے جبکہ فیصل آباد، سیالکوٹ،گوجرانوالہ، لاہور، شیخوپورہ،اوکاڑہ قصوراور ننکانہ صاحب کے اضلاع میں امرود کے زیرکاشت رقبہ میں اضافہ ہو گیا ہے ۔

ادارے نے کہا کہ امرود کافی سخت جان ہوتا ہے جسے کلراٹھی سمیت ہر قسم کی زمینوں میں کامیابی سے کاشت کیاجاسکتاہے مگر بہترین زمین وہ ہے جو زیادہ بھاری نہ ہونیز زمین میں نامیاتی مادہ کی مقدار کم ازکم ایک فیصد تک ہونا ضروری ہے۔ریسرچ انفارمیشن یونٹ آری فیصل آباد کے مطابق 75سے100کلوگرام فی پودا ان اقسام کی پیداواری صلاحیت ہے۔

باغبان امرود لگانے سے پہلے کم از کم 6.8فٹ کی گہرائی تک زمین کی نچلی سطح کا معائنہ ضرور کروائیں۔ادارے نے کہا کہ امرود کی نئی اقسام کی تیاری بذریعہ چشمہ پیدا کرنا بہتر ہے اس لیے امرود کے نئے باغات لگاتے وقت باغبان خیال رکھیں کہ ان کی آبپاشی کے لیے وافر نہری پانی موجود ہو اور منتخب شدہ کھیت برلب سڑک ہونا چاہیے تاکہ منڈی تک پھل کی ترسیل میں آسانی رہے۔

Short Link: https://urdu.app.com.pk/urdu/?p=383919