فیصل آباد۔ 27 جنوری (اے پی پی):محکمہ زراعت کی جانب سے کاشتکاروں کو بہاریہ مکئی کی ہائبرڈ اقسام کی کاشت جلد از جلد مکمل کرنے کی ہدایت کی گئی ہے۔ محکمہ زراعت توسیع فیصل آباد کے اسسٹنٹ ڈائریکٹرعامرصدیق نے کہا کہ کاشتکار اچھی پیداوار حاصل کرنے کےلئے بہاریہ مکئی کی دوغلی اقسام کی کاشت جلد مکمل کرنے کی کوشش کریں تاہم یہ کاشت آخر فروری تک بھی مکمل کی جاسکتی ہے اور مذکورہ کاشت کےلئے منظور شدہ اقسام ایف ایچ 810، یوسف والا ہائبرڈ اور دیگر دوغلی اقسام کی کاشت سے بہتر نتائج بھی حاصل کئے جا سکتے ہیں۔
انہوں نے کہا کہ بہاریہ مکئی کی وٹوں پر کاشت کےلئے بیج کی شرح 8 سے10کلوگرام فی ایکڑ جبکہ ڈرل سے کاشت کی صورت میں بیج کی شرح 12 سے 15 کلو گرام فی ایکڑ رکھنی چاہیے۔ انہوں نے کہاکہ بہاریہ مکئی کی ہائبرڈ اقسام کےلئے درمیانی ذرخیز زمین میں اڑھائی بوری ڈی اے پی، ڈیڑھ بوری پوٹاشیئم سلفیٹ، آدھی بوری یوریا یا ساڑھے6 بوری سنگل سپر فاسفیٹ 18فیصد ہمراہ ڈیڑھ بوری پوٹاشیئم سلفیٹ و ڈیڑھ بوری یوریا فی ایکڑ بوائی کے وقت ڈالنا ضروری ہے۔
انہوں نے کہاکہ جب پودوں کی اونچائی ایک فٹ ہو جائے تو کاشتکار مزید ایک بوری یوریا اور پودے کی اونچائی اڑھائی فٹ ہونے پر پھر ایک بوری یوریا فی ایکڑ استعمال کریں۔ انہوں نے کہاکہ بہاریہ مکئی کے پودے پر پھول آنے سے قبل بھی ایک بوری یوریا فی ایکڑ ڈالنے کے بہترین نتائج حاصل ہو سکتے ہیں۔
Short Link: https://urdu.app.com.pk/urdu/?p=552019
