فیصل آباد۔ 06 نومبر (اے پی پی):ڈویژنل ڈائریکٹر لائیو سٹاک فیصل آباد ڈاکٹر سید ندیم بدر نے کہا ہے کہ مویشی پال حضرات نے خود کولائیو سٹاک کارڈ سکیم کیلئے رجسٹرڈ کراناشروع کردیاہے ۔ انہوں نے کہا کہ فیصل آبادڈویژن کے چاروں اضلاع میں سول ویٹرنری ہسپتالوں اور ڈسپنسریوں میں وزیر اعلیٰ پنجاب لائیو سٹاک کارڈ سکیم بارے قائم کئے گئے سہولت ڈیسکوں پر مویشی پال حضرات کی جانب سے خصوصی دلچسپی دیکھنے میں آرہی ہے جہاں وزیراعلیٰ پنجاب مریم نوازشریف کے ویژن اور سیکرٹری لائیو سٹاک ثاقب علی عطیل کی ہدایات کے مطابق لائیو سٹاک کارڈز کے اجراکیلئے ان کی آن لائن رجسٹریشن جاری ہے۔
اس سلسلہ میں کسان لائیو سٹاک بیٹھک،سکول فوکس پروگرام،موبائل ویٹرنری ڈسپنسری اور موبائل ٹریننگ سکول بس کے ذریعے مویشی پال حضرات کو اس سکیم بارے آگاہی فراہم کی جا رہی ہے جبکہ تمام ویٹرنری ہسپتالوں اور ڈسپنسریوں میں سہولت ڈیسک بھی قائم کئے گئے ہیں۔ڈاکٹر سید ندیم بدر نے بتایا کہ مویشی پال کسانوں کیلئے وزیر اعلیٰ پنجاب کا یہ ایک انقلابی منصوبہ ہے جس کے تحت135000روپے سے 270000روپے تک 5ماہ کےلئے بغیر سود کے قرضہ حاصل کیاجاسکتاہے۔
انہوں نے اہلیت کے معیارسے متعلق آگاہ کرتے ہوئے بتایا کہ درخواست گزار صوبہ پنجاب کا رہائشی،اصل قومی شناختی کارڈ کا حامل ہو، درخواست گزار کی موبائل فون سم ایکٹو اور اس کے نام پر رجسٹرڈ ہونی چاہیے،درخواست گزار کم از کم پانچ سے دس کٹروں، بچھڑوں کا مالک ہو،دس سے زیادہ بچھڑے رکھنے والے درخواست گزار بھی قرضہ لینے کے اہل ہوں گے تاہم ان کو قرض کی سہولت صرف دس جانوروں کے اوپر دی جائے گی۔
انہوں نے کہا کہ قرضہ لینے کا خواہش مند مویشی پال8070 پر اپنا شناختی کارڈ نمبر میسج کرے،درخواست گزار کی الیکٹرانک کریڈٹ انفارمیشن بیورو کے ادارے سے صاف کریڈٹ ہسٹری (نادہندہ نہ ہونے) کے حامل ہونے کی تصدیق ہو گی۔اس کے علاوہ درخواست گزار کی نادرا اور نیکٹا کے اداروں سے شناخت اور کردار کی تصدیق بھی ہوگی۔انہوں نے بتایا کہ محکمہ اربن یونٹ درخواست گزار مویشی پال اور اس کے جانوروں کے موجود ہونے کی تصدیق کرے گا۔درخواست گزار کا محکمہ لائیو سٹاک کا ڈیٹا بیس 9211 پر رجسٹرڈ ہونا ضروری ہے۔انہوں نے بتایا کہ شرائط پر پورا اترنے والے اہل درخواست دہندگان کا انتخاب پہلے آئیے، پہلے پائیے کی بنیاد پر کیا جائے گا۔انہوں نے کہا کہ وزیر اعلیٰ پنجاب لائیو سٹاک کارڈ سے استفادہ کرنے کیلئے پنجاب انفارمیشن ٹیکنالوجی بورڈ کی ایپلی کیشن پر آن لائن اپلائی کیا جا سکے گا۔
قرض کا مکمل دورانیہ زیادہ سے زیادہ 150دن (پانچ ماہ) ہو گا۔ قرض استعمال کرنے کا دورانیہ120 دن (چار ماہ) ہوگا۔اگلے 30 دن(ایک ماہ) مکمل قرض واپس کرنے کا دورانیہ ہو گا۔انہوں نے کہا کہ مویشی پال حضرات کو وزیر اعلیٰ پنجاب لائیو سٹاک کارڈ کے ذریعہ بلا سود قرض فراہم کیا جائے گاجبکہ سود یا منافع کی رقم حکومت پنجاب برداشت کرے گی۔انہوں نے کہا کہ کم سے کم پانچ کٹروں اور بچھڑوں پر ستائیس ہزار روپے فی جانور کے حساب سے ایک لاکھ پینتیس ہزار کا قرض فراہم کیا جائے گا۔زیادہ سے زیادہ دس کٹروں وبچھڑوں پر ستائیس ہزار فی جانور کے حساب سے کل دو لاکھ ستر ہزار روپے قرض فراہم کیا جائے گا۔
انہوں نے کہا کہ قرض کی رقم ماہانہ بنیادوں پر فراہم کی جائے گی جبکہ مویشی پال قرض کی رقم سے بینک آف پنجاب کے رجسٹرڈ مقامی فیڈ ڈیلرز سے لائیو سٹاک کارڈ کو استعمال کر کے جانوروں کی خوراک ونڈا،سائیلیج اور نمکیاتی آمیزہ خرید سکیں گے۔ڈاکٹر ندیم بدر نے بتایا کہ اس ضمن میں تمام ویٹرنری ہسپتالوں میں سہولت ڈیسک بھی قائم کئے گئے ہیں جہاں سے کسان راہنمائی حاصل کر سکتے ہیں۔
Short Link: https://urdu.app.com.pk/urdu/?p=521734
