فیصل آباد۔ 20 نومبر (اے پی پی):ایف آئی اے فیصل آباد نے کروڑوں روپے کے فراڈ میں ملوث نجی بینک ملازمین سمیت 4 ملزمان کے خلاف مقدمہ درج کرکے مرکزی ملزم کو گرفتار کرلیا۔ تفصیلات کے مطابق ایف آئی اے کمپوزٹ سرکل فیصل آباد نے کروڑوں روپے کے مالی فراڈ میں ملوث بینک ملازمین سمیت 4 ملزمان کے خلاف مقدمہ درج کرکے مرکزی ملزم ایم سہیل کو گرفتار کیا۔
گرفتار ملزم نے دیگر ساتھیوں کی ملی بھگت سے ٹرسٹ فنڈز کے اکاونٹ سے کروڑوں روپے خرد برد کئے۔ملزم نے نجی ٹرسٹ کے نام سے جعلی ٹرسٹ ڈیڈ بنوائی۔ملزم نے مذکورہ ٹرسٹ ڈیڈ پر بینک ملازمین کی ملی بھگت سے اکاونٹ کھلوایا۔ جعلسازی میں نجی بینک کے 2 ملازمین بھی شامل ہیں۔مذکورہ اکاونٹ میں شہریوں نے کروڑوں کی ڈونیشن جمع کروائی۔ ملزم نے دیگر ساتھیوں کی ملی بھگت سے نجی ٹرسٹ کے نام پر بنوائے گئے اکاونٹ سے کروڑوں روپے غبن کئے۔ ملزمان نے مجموعی طور پر 2 کروڑ روپے سے زائد کا فراڈ کیا۔ابتدائی تفتیش کے مطابق ملزمان نے فیصل آباد کے علاوہ لاہور میں بھی اکاونٹ کھلوائے۔ملزمان کے خلاف لوکل پولیس میں بھی جعلسازی کے مقدمے درج ہیں۔اس سے قبل بھی ملزمان کے خلاف ایف آئی اے میں مقدمہ درج تھا۔حکام نے بتایا کہ ملزم کو گرفتار کر کے تفتیش کا آغاز کر دیا گیا۔دیگر ملزمان کی گرفتاری کیلئے چھاپے مارے جا رہے ہیں۔
Short Link: https://urdu.app.com.pk/urdu/?p=527458