فیصل آباد ۔ 26 دسمبر (اے پی پی):محکمہ زراعت نے کاشتکاروں کو گندم کی بہتر پیداوار کے لئے بروقت آبپاشی کی ہدایت کی ہے۔
ڈپٹی ڈائریکٹر محکمہ زراعت توسیع فیصل آبادخالد محمودنے کہا ہے کہ کاشتکار دھان، کپاس، مکئی اور کماد کے بعد گندم کی کاشتہ فصل کو پہلا پانی 80سے 90دن بعد اور پچھیتی کاشت کے لئے پہلا پانی شاخیں نکلتے وقت بوائی کے 20سے 25دن بعد جبکہ دوسرا پانی 70سے 80دن بعد گوبھ کے وقت اور تیسرا پانی 110سے 115دن بعد دانے کی دو دھیا حالت میں دیا جائے۔
انہوں نے کہا کہ گندم کی بہتر پیداوار کے لئے جڑی بوٹیوں کی تلفی انتہائی ضروری ہے۔ انہوں نے کہا کہ ایک اندازے کے مطابق جڑی بوٹیوں کی وجہ سے 14سے42فیصد پیداوار کم ہو جاتی ہے اور اگر جڑی بوٹیوں کی بر وقت تلفی کی جائے تو پیداوار میں 15فیصد تک اضافہ ہوتا ہے۔
انہوں نے کہا کہ پہلی آبپاشی کے بعد کھیت وتر حالت میں آنے پر دوہری بار ہیرو چلائیں جبکہ جڑی بوٹی مار زہروں کے سپرے کے لئے 100سے120لیٹر پانی فی ایکڑ استعمال کریں اور سپرے صاف اور خوشگوار موسم میں کی جائے۔انہوں نے کہا کہ دھند، بارش اور تیز ہواکی صورت میں سپرے ہر گز نہ کریں اور خیال رکھا جائے کہ دوران سپرے فصل کا کوئی حصہ دوہری بار سپرے نہ ہو اور کوئی حصہ سپرے سے رہ بھی نہ جائے۔
Short Link: https://urdu.app.com.pk/urdu/?p=539693
