فیصل آباد ۔ 18 اکتوبر (اے پی پی):باغبانوں کو اکتوبر کے آخر تک کھجور کے نئے پودے لگانے کا عمل مکمل کرنے کی ہدایت کی گئی ہے ۔ریسرچ انفارمیشن یونٹ آری فیصل آباد کے ماہرین نے کہا کہ چونکہ اکتوبر کا مہینہ کھجور کے نئے پودے لگانے کیلئے
موسمی حالات کے مطابق انتہائی موزوں ہے اس لئے باغبان مذکورہ مہینہ کے اختتام تک کھجور کے نئے پودے لگانے کا عمل مکمل کر لیں جبکہ کھجور کی کاشت کیلئے پانی کے اچھے نکاس والی ذرخیز میرا زمین کا انتخا ب کریں ،باغبان کھجور کے ایسے پودوں کا انتخاب کریں جن کا وزن 10سے15 کلو گرام تک اور وہ ہر لحاظ سے صحت مند اور بیماریوں سے پاک ہو۔باغبان پودے نکالنے کیلئے ایک مربع میٹر تک گڑھوں کی لمبائی، چوڑائی، گہرائی تک کھدائی کریں اور گڑھا کھودتے وقت اوپر کی 30سینٹی میٹر مٹی ایک طرف رکھیں اور باقی مٹی الگ رکھ دیں۔ انہوں نے کہا کہ پودا لگانے سے قبل گڑھے کو 2سے3 ہفتے تک کھلا چھوڑدیں۔
انہوں نے کہا کہ پودے کی منتقلی سے قبل نئے پودوں کی جڑیں 10سے12 گھنٹے تک پانی میں بھگوئیں اور پودے سے پودے کا فاصلہ 20سے25فٹ رکھیں۔انہوں نے کلورپائریفاس بحساب ایک لیٹر فی 100لیٹر پانی میں ملا کر پودوں کے گھیرے میں سپرے کرنے کی بھی ہدایت کی تاکہ پودے دیمک اور دیگر کیڑوں و بیماریوں سے محفوظ رہ سکیں۔ اس سلسلہ میں مزید معلومات ماہرین زراعت یا محکمہ زراعت کے فیلڈ سٹاف سے بھی حاصل کی جا سکتی ہیں۔
Short Link: https://urdu.app.com.pk/urdu/?p=514385
