فیصل آباد ، کاشتکاروں کوٹماٹر، مرچ، بینگن، کھیرے، چپن کدو کو کورے سے بچانے کیلئے سرکنڈے یا پرالی سے ڈھانپنے کی ہدایت

فیصل آباد ۔ 14 دسمبر (اے پی پی):ریسرچ انفارمیشن یونٹ ایوب زرعی تحقیقاتی ادارہ فیصل آباد کے ماہرین نے کاشتکاروں کو ٹماٹر، مرچ، بینگن، کھیرے، چپن کدو کو کورے سے بچانے کیلئے سرکنڈے یا پرالی سے ڈھانپنے کی ہدایت کی ہے ۔

انہوں نے کہا کہ سبزیوں کی کامیاب اور نفع بخش کاشت کا انحصار ان کی مناسب دیکھ بھال پر ہے کیونکہ سخت سردی،دھند، کورے سے موسم سرما کی کاشتہ سبزیاں متاثر ہوتی ہیں لہٰذا ان کو موسمی اثرات سے بچانے کےلئے احتیاطی تدابیر اختیار کرنا ضروری ہے جس کیلئے کاشتکار ٹماٹر، مرچ، بینگن،کھیرا اور چپن کدو کو کورے سے بچانے کیلئے سرکنڈا یا پرالی سے ڈھانپیں۔

انہوں نے کاشتکاروں کو آگاہ کیا کہ کورے کے عمل کے دوران زمین کے قریب کی ہوا ٹھنڈی ہوجاتی ہے اورچونکہ ٹھنڈی ہوا گرم ہوا کی نسبت بھاری ہوتی ہے اس لئے وہ زمین کی سطح کے قریب رہتی ہے اور رات کو یہ ہوا کورے یا کہر کی شکل اختیار کرلیتی ہے۔

انہوں نے کہاکہ جب رات کو کورا سبزیوں کے پتوں پر پڑتا ہے تو ٹھنڈک کی وجہ سے پتوں کا پانی جمنے کے باعث پھیل جاتا ہے جس سے پتوں کے خلیے ٹوٹ جاتے اور بعد میں نئی کونپلیں اور پتے خشک ہوجاتے ہیں۔انہوں نے کہاکہ کاشتکارکورے کی راتوں میں کھیتوں کی ہلکی آبپاشی کریں کیونکہ اس عمل سے سبزیوں کے پودوں کو کورے کے اثر سے بچایا جاسکتا ہے۔

Short Link: https://urdu.app.com.pk/urdu/?p=535867