فیصل آباد ۔ 02 مئی (اے پی پی):فیصل آباد پولیس نے ماہ اپریل 2025 کی کارکردگی رپورٹ جاری کردی، پولیس نے سنگین مقدمات میں مطلوب خطرناک اشتہاری ملزمان سمیت ڈکیت گینگز، منشیات فروش، ناجائز اسلحہ رکھنے اور نمائش والوں سمیت درجنوں جرائم پیشہ ملزمان گرفتار کرلئے۔
ترجمان طارق جٹ نے بتایا کہ سٹی پولیس آفیسر صاحبزادہ بلال عمر کی ہدایت پر پولیس نے ماہ اپریل میں جرائم پیشہ عناصر کے خلاف کارروائیوں میں گزشتہ ماہ اپریل کے دوران 687اشتہاری ملزمان کو گرفتار کیا جن میں 217 اے کیٹگری اور 470بی کیٹگری کے خطر ناک جرائم میں ملوث اشتہاری بھی شامل ہیں جبکہ 538 عدالتی مفروران گرفتار کیے۔ گزشتہ ماہ اپریل میں 29 گینگ کے 80 ملزمان گرفتار کرکے 1 کروڑ 40 لاکھ 37 ہزار روپے مالیت کا مال مسروقہ اور اسلحہ برآمد کیا گیا۔
گینگز سے2 رکشہ،8 موٹر سائیکلز، 13 موبائل فون، اورزیورات و نقدی برآمد کئے گئے۔ملزمان چوری اور ڈکیتی و رابری کے مقدمات میں مطلوب تھے۔ملزمان کے قبضہ سے 24 پسٹل 30 بور اور متعدد گولیاں بھی برآمد کر لیں۔ برآمد ہونے والا مال مسروقہ اصل مالکان کے حوالے کیا گیا۔مختلف تھانوں میں جواء اور پرچی مافیا کے خلاف کاروائی کرتے ہوئے گزشتہ ماہ میں 73 مقدمات کا اندراج کرکے 255 ملزمان گرفتار کئے گئے۔ جواء مافیا کے قبضہ سے د اؤ پر لگی رقم 5لاکھ88 ہزار،رجسٹر،تاش،پرچیاں،چٹھے اور دیگر جواء کا سامان پولیس تحویل میں لیا گیا۔
پولیس نے منشیات فروشوں کے خلاف کاروائیوں کے دوران398 مقدمات درج کر کے 398 ملزمان گرفتار کئے گئے۔ملزمان سے چرس 91.010کلو گرام، آئس 4.805 کلو گرام، ہیرون 30.585کلو گرام، بھکی 26.600 کلوگرام اور شراب 6680لیٹر برآمد کرکے پولیس تحویل میں لی گئی۔ ناجائز اسلحہ رکھنے والوں کے خلاف کاروائیوں میں 370مقدمات درج کرکے 370 ملزمان گرفتار کئے گئے۔ پسٹل 309 عدد، کلاشنکوف 6 عدد، رائفل 21 عدد، بندوق9 عدد،رپیٹر 16عدد، کاربین 3 عدد متعدد گولیاں اور کارتوس برآمد کئے گئے۔
ترجمان نے بتایا کہ سٹی پولیس کی جانب سے جرائم پیشہ عناصر کی سرکوبی کیلئے کریک ڈاؤن جاری ہے۔ قانون کی بالا دستی اور شہریوں کے جان و مال کے تحفظ کے لیے بھر پور ایکشن لیا جارہا ہے۔مؤثرگشت،ایلیٹ اور ڈولفن فورس کے آپریشنزکے لیے نئی حکمت عملی سمیت تھانہ،سرکل اور ٹاؤن کی سطح پر مانیٹرنگ اورکریمینلزکے قلع قمع کے لیے اقدامات کیے جارہے ہیں۔
Short Link: https://urdu.app.com.pk/urdu/?p=591401
