فیصل آباد۔15جون (اے پی پی):رائس ریسرچ انسٹی ٹیوٹ کی جانب سے کاشتکاروں کو دھان کی کاشت بروقت مکمل کرنے کی ہدایت کی گئی ۔ انسٹیٹیوٹ کے ترجمان نے کہاکہ ذرخیز زمینوں کے علاوہ ایسی شور زدہ کلراٹھی زمینوں میں بھی دھان کامیابی سے کاشت کیاجاسکتاہے جہاں کوئی اور فصل کامیاب نہیں ہو سکتی۔
انہوں نے کہاکہ کاشتکار بیج کو سفارش کردہ پھپھوندی کش زہر بحساب 2 سے اڑھائی گرام فی کلولگائیں اور شرح بیج مروجہ طریقہ کاشت کے حساب سے رکھیں۔ انہوں نے کہاکہ موٹی اقسام کی پنیری کدو کے طریقہ سے کاشت کرنی ہو تو 6سے 7کلو گرام، خشک طریقہ میں 8 سے 10کلوگرام، داب کے طریقہ میں 12سے15کلوگرام بیج فی ایکڑ استعمال کریں ۔
انہوں نے کہاکہ ہائبرڈ اقسام کے کدو کے طریقہ سے شرح بیج 6کلوگرام فی ایکڑ رکھیں ، اگر دھان کی پنیری کمزور نظر آئے تو ایک پاؤ یوریا یا نصف کلو امونیم سلفیٹ فی مرلہ کے حساب سے پنیری کی منتقلی سے قبل ضرور ڈالیں ۔انہوں نے کاشتکاروں کو سپرفائن، کشمیر ا، مالٹا، ہیرو، سپرااور اسی طرح کی دیگر اقسام ہرگز کاشت نہ کرنے کی ہدایت کرتے ہوئے کہا کہ کاشتکار صرف منظورشدہ اقسام ہی کاشت کریں تاکہ دھان کی فصل کو بکائنی اور پتوں کے بھورے دھبوں جیسی بیماریوں سے بچانے کے ساتھ ساتھ صحت مند فصل حاصل کی جاسکے۔
انہوں نے کہاکہ دھان کی فصل ہرقسم کی زمین میں کاشت کی جاسکتی ہے سوائے ایسی ریتلی زمینوں کے جہاں پانی کھڑا نہ رہ سکے۔ اس ضمن میں مزید رہنمائی کے لیے ماہرین زراعت یا محکمہ زراعت کے فیلڈ سٹاف کی خدمات سے بھی استفادہ کیا جا سکتا ہے۔
Short Link: https://urdu.app.com.pk/urdu/?p=369300
