فیصل کریم کنڈی کی حلف برداری میں رکاوٹوں پر پی ٹی آئی پر تنقید

اسلام آباد۔20جولائی (اے پی پی):گورنر خیبر پختونخوا فیصل کریم کنڈی نے صوبائی حکومت کی جانب سے منتخب اراکین کو آئینی حلف اٹھانے سے روکنے پر مذمت کی ہے۔اتوار کو نجی ٹی وی سے گفتگو کرتے ہوئے ان کا کہنا تھا کہ پاکستان تحریک انصاف کا ایسا غیر جمہوری رویہ ’’شرمناک‘‘ اور ’’جمہوری اصولوں کا مذاق‘‘ ہے۔انہوں نے کہا کہ حلف اٹھانا ہر منتخب نمائندے کا آئینی حق ہے۔

انہوں نے کہا کہ اس عمل میں رکاوٹیں کھڑی کرنا افسوسناک اور جمہوری اقدار کی خلاف ورزی ہے۔انہوں نے حلف اٹھانے کا اختیار انہیں سونپنے پر پشاور ہائی کورٹ کا شکریہ ادا کیا۔ انہوں نے کہا کہ جمہوریت کو ہر قیمت پر برقرار رکھا جانا چاہیے۔ انہوں نے کہا کہ پی ٹی آئی کی زیرقیادت صوبائی حکومت جان بوجھ کر آئینی فرائض میں رکاوٹ ڈال رہی ہے۔ ان کارروائیوں سے ان کی جمہوری اصولوں کی بے توقیری کھل کر سامنے آئی۔