لاہور۔22مئی (اے پی پی):سابق وزیر اعظم چوہدری شجاعت حسین سے پاکستان الیکٹرک فین منیو فیکچرز ایسوسی ایشن کے وفد نے ا نکی رہائشگاہ پر ملاقات کی۔
صوبائی وزیر صنعت و تجارت چوہدری شافع حسین بھی ملاقات میں موجود تھے۔ وفد کی قیادت چیئرمن پیفما نبیل الیاس کر رہے تھے۔ وفد نے فین انڈسٹری کو درپیش مسائل سے آگاہ کیا۔وفد نے فین انڈسٹری کے حوالے سے نئے ایس آر او سے پیدا ہونے والی صورتحال اور سرکاری اداروں کی جانب سے پیمنٹ اور دیگر مسائل سے بھی آگاہ کیا۔چیئرمین پیفمانے اس موقع پر گفتگو کرتے ہوئے کہا کہ چوہدری شجاعت حسین نے ہمیشہ فین انڈسٹری کا خیال رکھا اور اب بھی وہ مسائل کے حل میں اپنا کردار ادا کریں گے،
چوہدری شجاعت حسین سے ہماری امیدیں وابستہ ہیں،اس لئے ان کے پاس آئے ہیں۔پاکستان مسلم لیگ کے صدر چوہدری شجاعت حسین نے فین انڈسٹری کے مسائل کے حل کی یقین دہانی کراتے ہوئے کہا کہ فین انڈسٹری سے لاکھوں لوگوں کا روزگار وابستہ ہے، اس لیے انڈسٹری کے مسائل کے حل کیلئے وزیر اعظم سے بات کروں گا اورفین انڈسٹری کے مسائل ترجیحی بنیادوں پر حل کرائیں گے۔صوبائی وزیر صنعت و تجارت نے کہا کہ پنجاب کے سپیشل اکنامک زونز میں سرمایہ کاروں کو خصوصی مراعات حاصل ہیں۔
سپیشل اکنامک زونز میں سرمایہ کاری پر 10سال تک انکم ٹیکس کی چھوٹ اور ایک مرتبہ ڈیوٹی فری مشینری درآمد کی سہولت موجود ہے پنجاب میں سرمایہ کاری کے لئے سازگار ماحول کے باعث تیزی سے نئی ملکی اور غیر ملکی سرمایہ کاری آرہی ہے۔فین انڈسٹری سے وابسطہ سرمایہ کار سپیشل اکنامک زونز میں نئی انڈسٹری لگا سکتے ہیں۔ انہوں نے بتایا کہ گجرات میں 300ایکڑ رقبے پر نئی انڈسٹریل اسٹیٹ بنائی جا رہی ہے۔
چوہدری شافع حسین نے کہا کہ گجرات کی فین انڈسٹری مشرق وسطی اور دیگر ممالک کو پنکھے برآمد کرتی ہے فین انڈسٹری کے جائز مسائل ترجیحی بنیادوں پر حل کرائیں گے،وفد میں مختلف فین مینوفیکچرنگ کمپنیوں کے حکام شامل تھے ۔
Short Link: https://urdu.app.com.pk/urdu/?p=600379
