اسلام آباد۔1ستمبر (اے پی پی):ڈائریکٹر جنرل فیڈرل گورنمنٹ ایمپلائز ہاؤسنگ اتھارٹی کیپٹن (ر) ظفر اقبال نے ادارے کے نظم و ضبط کو یقینی بنانے اور بلاوجہ غیر حاضری، غیر مجاز چھٹیوں اور ڈسپلن کی خلاف ورزیوں کے تدارک کے لئے نہایت جرأت مندانہ اور مثالی قدم اٹھایا ہے۔ترجمان کے مطابق ادارے کے چار ملازمین جن میں ملازم حسین (اسسٹنٹ)، مہدی علی (سٹینو ٹائپسٹ)،ہدایت اللہ (سکیورٹی گارڈ) اور سلمان ظفر (نائب قاصد) شامل ہیں، ان ملازمین کو بارہا تنبیہ کے باوجود ڈسپلن کی سنگین خلاف ورزی اور غیر مجاز غیر حاضری پر فوری طور پر ملازمت سے برطرف کر دیا گیا ہے۔اسی طرح دو دیگر ملازمین کو سرکاری قواعد کے تحت وارننگ جاری کی گئی ہے تاکہ آئندہ وہ ڈسپلن کی کسی بھی خلاف ورزی سے باز رہیں۔
ڈائریکٹر جنرل نے اس موقع پر ایڈمنسٹریشن کو سختی سے ہدایت کی ہے کہ ادارے کے اندر کسی بھی ملازم کی بلاوجہ غیر حاضری، فرائض کی ادائیگی میں غفلت، ڈسپلن کی خلاف ورزی یا کرپشن کے واقعات ہرگز برداشت نہ کئے جائیں اور ایسی صورت میں متعلقہ افراد کے خلاف بھی اسی نوعیت کی سخت اور فوری کارروائی عمل میں لائی جائے۔یہ اقدام نہ صرف ادارے کے اندر ایک مثالی ڈسپلن کے قیام کی طرف ایک بڑا قدم ہے بلکہ یہ پیغام بھی دیتا ہے کہ اداروں میں عوامی وسائل کے تحفظ اور شفافیت کو ہر حال میں یقینی بنایا جائے گا۔ کیپٹن (ر) ظفر اقبال کی یہ جرأت مندانہ کارروائی اس بات کا عملی ثبوت ہے کہ ایف جی ای ہاؤسنگ اتھارٹی میں قانون، نظم و ضبط اور شفافیت کو ہر قیمت پر مقدم رکھا جائے گا۔
