راولپنڈی۔5جنوری (اے پی پی):قائد اعظم ٹرافی کے فائنل میں سیالکوٹ نے انتہائی دلچسپ اور اعصاب شکن مقابلے کے بعد پشاور کو ایک وکٹ سے شکست دے کر قومی چیمپئن بننے کا اعزاز حاصل کر لیا، سیالکوٹ نے 173 رنز کا ہدف 9 وکٹوں کے نقصان پر حاصل کر لیا ، کپتان عماد بٹ اور شاہ زیب بھٹی کی ذمہ دارانہ بیٹنگ نے اس جیت میں فیصلہ کن کردار ادا کیا، عماد بٹ نے 65 اور شاہ زیب بھٹی نے 32 ( ناٹ آؤٹ) رنز بنائے ، عماد بٹ کو مرد میدان قرار دیا گیا ۔یوبی ایل اسپورٹس کمپلیکس میں کھیلے گئے فائنل میں سیالکوٹ کو جیتنے کے لیے 173 رنز کا ہدف ملا تھا ، میچ کے تیسرے دن کھیل کے اختتام پر اس کی 5 وکٹیں صرف 59 رنز پر گر چکی تھیں اور اسے کامیابی کے لیے مزید 114 رنز بنانے تھے
میچ کے چوتھے روز سیالکوٹ کے کپتان عماد بٹ اور احسن حفیظ بھٹی نے اننگز شروع کی لیکن صرف 10 رنز کے اضافے پر احسن حفیظ 5 رنز کے انفرادی اسکور پر عامر خان کی گیند پر آؤٹ ہو گئے، عامر خان نے افضل منظور کو بھی ایک رن پر آؤٹ کر کے سیالکوٹ کی جانب مشکلات میں اضافہ کر دیا، کپتان عماد بٹ کی مزاحمت جاری رہی لیکن جب سیالکوٹ کی ٹیم جیت سے صرف 22 رنز دوری پر تھی وہ 65 رنز بنا کر ساجد خان کی گیند پر کلین بولڈ ہو گئے ، ان کی اننگز میں 9 چوکے اور ایک چھکا شامل تھا، شاہ زیب بھٹی اور شعیب اختر جونیئر نے نویں وکٹ کی شراکت میں قیمتی 21 رنز بنا کر ٹیم کو جیت کے قریب کر دیا لیکن جب سیالکوٹ کو جیت کے لیے صرف ایک رن درکار تھا تو شعیب اختر جونیئر 4 رنز بنا کر اسرار اللہ کی گیند پر آؤٹ ہو گئے
اس موقع پر شاہ زیب بھٹی نے ساجد خان کی گیند پر چوکا لگا کر اپنی ٹیم کو تاریخی فتح دلا دی، انہوں نے 51 گیندوں کا سامنا کرتے ہوئے 4 چوکوں کی مدد سے 32 رنز کی ناقابل شکست اننگز کھیلی ، پشاور کی طرف سے نیاز خان چار اور عامر خان تین وکٹیں حاصل کرنے میں کامیاب رہے، نیاز خان نے میچ میں مجموعی طور پر 9 وکٹیں حاصل کیں۔قائداعظم ٹرافی میں سب سے زیادہ 844 رنز سیالکوٹ کے نوجوان بیٹر اذان اویس نے اسکور کیے جس میں 4 سنچریاں اور 2 نصف سنچریاں شامل ہیں، پشاور کے نیاز خان نے ٹورنامنٹ میں سب سے زیادہ 39 وکٹیں حاصل کیں، ٹورنامنٹ میں سب سے کامیاب وکٹ کیپر سیالکوٹ کے 19 سالہ افضل منظور رہے جنہوں نے مجموعی طور پر ایک اسٹمپڈ اور 38 کیچز لیے
ٹورنامنٹ میں بہترین انفرادی اننگز لاہور وائٹس کے علی زریاب نے کھیلی، انہوں نے سیالکوٹ کے خلاف 206 رنز بنائے جبکہ بہترین انفرادی باؤلنگ فاٹا کے آفاق آفریدی کی رہی جنہوں نے لاہور بلوز کے خلاف 57 رنز دے کر 8 وکٹیں حاصل کیں۔
