قصور۔27 اگست (اے پی پی):سپیکر پنجاب اسمبلی ملک محمد احمد خاں نے سیلابی علاقوں میں پانی کی موجودہ صورتحال کا تفصیلی جائزہ لیا، مختلف مقامات پر قائم ریلیف کیمپوں کا معائنہ کیا اور فراہم کی جانیوالی سہولیات کو چیک کیا۔سپیکرپنجاب اسمبلی نے سیلاب متاثرین سے ملاقات کی، انکے مسائل سنے اور ضلعی انتظامیہ کو متاثرہ خاندانوں کے فوری مسائل حل کرنے کی ہدایت کی۔ملک محمد احمد خاں کی دریا کے دوسرے کنارے آباد بستیوں کے رہائشیوں کو بروقت محفوظ مقامات پر منتقل کرنے کی ہدایت کی۔
سپیکر پنجاب اسمبلی ملک محمداحمدخاں نے بتایا کہ دریائے ستلج میں پانی کی سطح مسلسل بلند ہو رہی ہے جس کے باعث قریبی بستیوں اور کھیتوں کو خطرات لاحق ہیں‘ کسی بھی ناخوشگوار صورتحال سے بچنے کے لئے انخلاء نہایت ضروری ہے‘سیلاب متاثرین کوسہولیات کی فراہمی میں کوئی کسر نہیں چھوڑی جائے گی۔
ملک محمداحمدخاں نے کہا کہ پنجاب حکومت سیلاب متاثرین کی بحالی اور امداد کیلئے تمام وسائل بروئے کار لا رہی ہے‘ متاثرہ عوام کو تنہا نہیں چھوڑیں گے ان کے دکھ درد میں برابر کی شریک ہیں۔
ملک محمد احمد خاں نے عطر سنگھ والا دفاعی بند،باقر کے، سیخ سعد، تتارا کامل، نجابت، ساندہ خانواہ،جنگا سنگھ والا،رنگے والا،بود سنگھ والا، وہاڑی فارم بشمولہ صدر اور دیگر سیلاب متاثرہ دیہاتوں کا دورہ کیا۔اس موقع پر سابق سینئر وائس چیئرمین ضلع کونسل ملک اعجاز احمد خاں، ممبر پنجاب بار کونسل ملک ریاض احمد خاں اور متعلقہ ضلعی افسران بھی موجود تھے۔
