قصور۔ 04 ستمبر (اے پی پی):ماہ اگست کے مہینے میں ریسکیو 1122 نے 4653 ایمرجنسی متاثرین کے علاوہ 17529 سیلاب متاثرین کو بھی ریسکیو کیا۔ان خیالات کا اظہارڈسٹرکٹ ایمرجنسی آفیسر ریسکیو1122قصورڈاکٹر نیئر عالم خان نے ماہانہ جائزہ اجلاس کی صدارت کرتے ہوئے کیا۔ اجلاس میں قصور پتوکی کوٹ رادھا کشن چونیاں پھولنگر مصطفی آباد اور کھڈیاں سے ریسکیو انچارجز نے شرکت کی۔اجلاس میں گزشتہ ماہ کے دوران ریسکیو سروس کی کارگردگی کا جائزہ لیا گیا۔
اجلاس کے اختتام پر گزشتہ ماہ کی کارگردگی رپورٹ جاری کرتے ہوئے کنٹرول روم انچارج مسٹر روح الامین نے بتایا کہ ریسکیو 1122 قصور نے اگست کے مہینے میں 4471 ریسکیو آپریشنز سرانجام دیئے‘ ان آپریشنز میں 4653 ایمرجنسی متاثرین کو ریسکیوکیا گیا جن میں روڈ ٹریفک ایکسیڈنٹ کی تعداد 1146، میڈیکل ایمرجینسی کی تعداد 2555، لڑائی جھگڑے اور فائرنگ کے 93 واقعات عمارتیں گرنے کے 8 واقعات پانی میں ڈوبنے کے 13 واقعات رپورٹ ہوئے اس دوران سروس نے سات منٹ سے کم اوسط ریسپانس ٹائم بھی برقرار رکھا‘ اگست کے مہینے میں قصور میں آگ لگنے کے 33 واقعات رپورٹ ہوئے جن میں بروقت اور جدید طرز پر فائر فائٹنگ کرتے ہوئے حادثات کو سانحات بننے سے بچایا گیا۔
ڈسٹرکٹ ایمرجنسی آفیسر ڈاکٹر نیئر عالم خان نے عوام کے نام پیغام میں کہا کہ حادثات سے بچاؤ کے لیے ٹریفک قوانین سے آگاہی اوران پر عمل کرنا ضروری ہے‘اس کے علاوہ دریائے ستلج اور دریائے راوی پر سیلابی صورتحال کی وجہ سے ملحقہ آبادیوں میں فلڈ ریلیف آپریشن بھی جاری ہے جس 17529 متاثرہ افراد کو محفوظ مقامات پر منتقل کیا گیا جبکہ 6000 سے زائد مویشیوں کو بھی ریسکیو کیا گیا فلڈ ریلیف آپریشن ڈسٹرکٹ ایمرجنسی آفیسر ڈاکٹر نیئر عالم خاں کی نگرانی میں تاحال جاری ہے۔
