قصور ، زیر حراست مرد و خواتین کی ویڈیو بنانے پر ڈی پی او کا سخت ایکشن، تفتیشی آفیسر ،مثل رائٹر گرفتار

قصور۔ 07 اپریل (اے پی پی):قصور کے تھانہ مصطفیٰ آباد میں زیر حراست مرد و خواتین کی ویڈیو بنانے پر ڈی پی او قصور محمد عیسیٰ خاں کا سخت ایکشن، تفتیشی آفیسر اور مثل رائٹر گرفتار، حوالات میں بند کر دیا گیا۔ پولیس ذرائع کے مطابق ویڈیو وائرل کرنے پر سب انسپکٹر محمد صادق اور کانسٹیبل ندیم ناگی(PHP) کے خلاف پیکا ایکٹ اور 155 سی کے تحت مقدمہ درج کر لیا گیا۔

سب انسپکٹر محمد صادق کو نوکری سے برخاستگی کی بھی سزا ، انسپکٹر ثقلین بخاری ایس ایچ او مصطفیٰ آباد معطل، کلوز لائن اور میجر سزا (نوکری سے برخاستگی) کی ریکمنڈیشن بھی جاری کر دی گئی۔ سکیورٹی کانسٹیبل کو ڈانس پارٹی کے متعلق افسران بالا کو آگاہ نہ کرنے پر نوکری سے برخاستگی کی سزا سنا دی گئی۔

محرر تھانہ مصطفیٰ آباد محمد شبیر کو حوالات میں ویڈیو بننے سے نہ روکنے پر 02 سٹیجز پر تنخواہ کی تنزلی کی سزا دی گئی۔ ڈی پی او قصور محمد عیسیٰ خاں نے کہا کہ محکمہ پولیس ڈسپلن فورس ہے فرائض میں غفلت کسی صورت برداشت نہیں۔

Short Link: https://urdu.app.com.pk/urdu/?p=578958