اسلام آباد۔1ستمبر (اے پی پی):قومی اسمبلی میں حضور اکرمﷺ کی ولادت باسعادت کے 1500 ویں سال کی آمد پر تصویری نمائش کا انعقاد کیا گیا ۔ پیر کو سپیکر قومی اسمبلی سردار ایاز صادق نے پارلیمنٹ ہائوس میں روح پرور تصویری نمائش کا افتتاح کیا۔ سپیکر سردار ایاز صادق کو معروف خطاط واصل شاہد نے نمائش میں رکھے گئے فن پاروں سے متعلق تفصیلی بریفنگ دی۔ تقریب میں ڈپٹی سپیکر غلام مصطفیٰ شاہ، ممبر قومی اسمبلی اعجاز جاکھرانی اور سید حفیظ الدین شریک ہوئے۔ تقریب میں مختلف مکاتب فکر کے افراد اور قومی اسمبلی سیکرٹریٹ کے افسران کی بڑی تعداد بھی موجود تھی۔
سپیکر کا کہنا تھا کہ حضرت محمد ﷺ کی ذات اقدس پوری انسانیت کے لیے رحمت اور ہدایت کا سرچشمہ ہیں۔سیرت النبی ﷺ کی ذات اقدس پر مبنی تقریبات ایمان کو تازگی بخشتی ہیں۔سیرت النبی ﷺ سے متعلق تصاویری نمائش نوجوان نسل کے لیے مشعل راہ ہے۔روحانی اور فکری سرگرمیاں امتِ مسلمہ کی یکجہتی و اخوت کو مضبوط کرتی ہیں۔ شرکائے تقریب نے تصویری نمائش کو نبی کریم ﷺ کی حیات طیبہ کے پہلوئوں کو اجاگر کرنے کی بہترین کاوش قرار دیا۔ شرکاء نے منتظمین کی کاوشوں کو خراج تحسین پیش کیا۔
